Մալայզիայի ափերի մոտ նավաբեկության հետևանքով 60-ից ավելի մարդ է անհայտ կորել

Մարդատար նավ է խորտակվել Մալայզիայից արևմուտք ընկած շրջանում, 61 մարդ անհայտ կորած է համարվում: Այդ մասին հունիսի 18-ին հաղորդել է Reuters գործակալությունը՝ հղում անելով նավագնացության պետական գործակալությանը:

Նշվում է, որ նավը տեղական ժամանակով կեսգիշերին խորտակվել է Բանտինգ քաղաքից մոտավորապես 3 կիլոմետր հեռավորության վրա:

Նավի վրա եղել է 97 մարդ, մեծամասամբ՝ ինդոնեզացիներ: Ինչպես հայտարարել է իշխանությունների ներկայացուցիչը, ուղևորներն, ամենայն հավանականությամբ, փորձում էին Մալայզիայի տարածք ներթափանցել անօրինական ճանապարհով: Նրանց թվում եղել են կանայք ու երեխաներ:

Գործակալությունը երեք նավ է ուղարկել նավաբեկության հետևանքով տուժածներին և զոհերին որոնելու համար, հաղորդել է ՌԻԱ Նովոստին: