Աֆղանստանում նախագահի թեկնածու Աբդուլան կոչ է արել դադարեցնել ընտրությունների արդյունքների ամփոփումը

Աֆղանստանի նախագահի պաշտոնի թեկնածու, երկրի արտաքին գործերի նախկին նախարար Աբդուլա Աբդուլան հունիսի 18-ին կոչ է արել անհապաղ դադարեցնել հունիսի 14-ին կայացած ընտրությունների երկրորդ փուլի ձայների հաշվումը, որը, նրա կարծիքով, ուղեկցվում էր զանգվածային կեղծումներով: Այդ մասին հաղորդվում է Աֆղանստանի TOLO News հեռուստաալիքի կայքում:

Թեկնածուի խոսքով՝ կեղծումները կատարվել են տեղական ընտրական հանձնաժողովների և ոստիկանության աշխատակիցների մասնակցությամբ: Մասնավորապես, Աբդուլա Աբդուլան հայտնել է, թե ապացույցներ ունի, որ քվեարկության համար դրված տուփերը դեռ քվեարկության նախօրյակին լցվել են քվեաթերթիկներով: Նա նաև կասկած է հայտնել առ այն, որ ընտրություններին յոթ միլիոն աֆղանցի է մասնակցել, ինչպես այդ մասին հայտարարել էր ընտրական հանձնաժողովը:

Աբդուլա Աբդուլան հայտարարել է, որ ընտրական հանձնաժողովներից հետ է կանչում իր դիտորդներին: Նա նշել է, որ իրեն համարում է ընտրությունների երկու փուլերի հաղթող, և չի ընդունի այլ արդյունքներ, եթե ձայների հաշվումը անհապաղ չդադարեցվի:

Աֆղանստանի նախագահական ընտրությունների երկրորդ փուլի շրջանակներում քվեարկությունը կայացել է շաբաթ օրը՝ հունիսի 14-ին: Ավելի վաղ պլանավորվել էր, որ ընտրությունների նախնական արդյունքները կհրապարակվեն հուլիսի 2-ին, իսկ քվեարկության վերջնական արդյունքները Աֆղանստանի ԿԸՀ-ն կհայտարարի հուլիսի 22-ին:

Նախագահական ընտրությունների առաջին փուլը, որն Աֆղանստանում անցկացվել է ապրիլին, չի պարզել դրանց հաղթողին: Առաջ են անցել երկու թեկնածուներ՝ Աբդուլա Աբդուլան և ֆինանսների նախկին նախարար Աշրաֆ Գանի Ահմադզայը: Առաջինը հավաքել է ընտրողների ձայների 44,9 տոկոսը, երկրորդը՝ 31,5 տոկոսը: Այսինքն՝ 50 տոկոսի սահմանագիծն այդ ժամանակ ոչ ոք չի հաղթահարել: Ինչից հետո էլ նշանակվել է երկրորդ փուլը, հաղորդել է ՌԻԱ Նովոստին: