Արքայազն Ֆիլիպեն պաշտոնապես դարձել է Իսպանիայի Ֆիլիպ VI թագավորը

Արքայազն Ֆիլիպեն տեղական ժամանակով կեսգիշերին (Երևանի ժամանակով ժամը 02:00-ին) պաշտոնապես դարձել է Իսպանիայի Ֆիլիպ VI թագավորը: Նրա գահակալման արարողությունը հունիսի 19-ին տեղի կունենա երկրի խորհրդարանի ստորին և վերին պալատների համատեղ նիստում:

46-ամյա Ֆիլիպ VI-ը երդում կտա, իսկ այնուհետև հանդես կգա ճառով, որում, ինչպես սպասվում է, կներկայացնի իր՝ որպես պետության ղեկավարի գործունեության հիմնական ուղղությունները:

Արքայազնը լավ կրթություն է ստացել Իսպանիայում, Կանադայում և ԱՄՆ-ում, ինչպես նաև զինվորական պատրաստություն է անցել բոլոր զորատեսակներում: Երկար տարիներ արքայազնը կատարել է պաշտոնական արտասահմանյան ուղևորություններ, ինչը նրան հնարավորություն է տվել անձամբ ծանոթանալու տարբեր երկրների բազմաթիվ ղեկավարների և թագավորական ընտանիքների անդամների հետ: Նա նաև այցելել է Իսպանիայի բոլոր ինքնավար մարզեր և քաջատեղյակ է նրանց հիմնախնդիրներին: Բացի այդ, Ֆիլիպեն աչքի է ընկնում համեստությամբ, դատողությունների կշռադատվածությամբ, զսպվածությամբ և լավ դաստիարակությամբ: Նրա հեղինակությունն արատավորված չէ որևէ սկանդալով, իսկ արքայադուստր Լետիսիայի և երկու դուստրերի հետ ընտանեկան կյանքը սիրո և փոխադարձ խորը հարգանքի օրինակ է շատերի համար:

Դատելով հանրային կարծիքի հարցումների տվյալներից՝ նոր միապետը համակրանք է ներշնչում Իսպանիայի բնակչության մեծամասնությանը և վայելում է խոշորագույն քաղաքական կուսակցությունների աջակցությունը, հաղորդել է ԻՏԱՌ-ՏԱՍՍ գործակալությունը: