Իրանի և «վեցյակի» բանակցություններում լուրջ առաջնընթաց չկա. Ֆրանսիայի ԱԳՆ

Իրանական միջուկային ծրագրի շուրջ Թեհրանի և «վեցյակի» բանակցություններում լուրջ առաջընթաց չկա: Այդ մասին հայտարարել է Ֆրանսիայի ԱԳ նախարարության քաղաքական տնօրեն Նիկոլյա դե Ռիվիերը՝ ԻՏԱՌ-ՏԱՍՍ-ի խնդրանքով ամփոփելով Վիեննայում բանակցությունների երրորդ օրվա արդյունքները:

«Վեցյակի» (ՄԱԿ-ի Անվտանգության խորհրդի հինգ մշտական անդամները և Գերմանիան) հետ Իրանի կոնսուլտացիաները հունիսի 18-ին շարունակվել են 12 ժամ: Ինչպես լրագրողներին հայտնել է եվրոպական դիվանագիտության ղեկավարի մամուլի քարտուղար Մայքլ Մանը, «համաձայնագրի սևագրի վրա աշխատանքը շարունակվում է»:

Նրա խոսքով՝ հունիսի 19-ին Թեհրանի և «վեցյակի» պատվիրակությունները կշարունակեն բանակցությունները: «Աշխատանքային օրը կսկսվի Եվրամիության արտաքին գործերի և անվտանգության քաղաքականության գերագույն կոմիսար Քեթրին Էշթոնի և Իրանի արտաքին գործերի նախարար Ջավադ Զարիֆի հանդիպմամբ»:

Նախօրյակին կողմերին հաջողվել է փոքր-ինչ առաջ շարժվել բանակցություններում: Ինչպես լրագրողներին հայտնել է Զարիֆը, համաձայնագիրը, որը կոչված է փակել «իրանական միջուկային դոսյեն», վերջապես անվանում է ստացել: Այժմ վաղօրոք սահմանված ժամկետում տեղավորվելու համար Իրանը և «վեցյակը» պետք է մեկ ամսվա ընթացքում կազմեն և համաձայնեցնեն համատեղ գործողությունների համապարփակ պլանը:

Ինչպես ԻՏԱՌ-ՏԱՍՍ-ին հայտնել է արևմտյան պատվիրակություններից մեկի մի աղբյուր, նախկինի պես հիմնական վիճահարույց հարցերը մնում են Իրանի հարստացուցիչ ծրագրի ծավալը, այդ թվում՝ ցենտրիֆուգների թվաքանակն ու որակը, Արաքի միջուկային ռեակտորի պարամետրերը և Թեհրանի նկատմամբ գործող տնտեսական պատժամիջոցների վերացման տեմպերը: