Աբխազիայի և Հարավային Օսիայի ներկայացուցիչները լքել են Ժնևի բանակցությունները

Վրաստանի պատվիրակությունը Ժնևի քննարկումների ընթացքում չի կարողացել քննարկել օրակարգով նախատեսված բոլոր հարցերը, քանի որ Աբխազիայի և Հարավային Օսիայի ներկայացուցիչները լքել են բանակցությունները դրանց սկսվելուց մի քանի րոպե անց:

«Այդ ապակառուցողական գործողությունները մեզ հնարավորություն չտվեցին ամբողջությամբ քննարկել Ժնևի բանակցությունների օրակարգով նախատեսված հարցերը: Առաջին անգամը չէ, որ նման բան է տեղի ունենում: Ցավոք, որոշակի փաստեր եղել են նաև բանակցությունների այլ փուլերում»,- Ժնևում լրագրողներին հայտարարել է Վրաստանի արտաքին գործերի առաջին փոխնախարար Դավիթ Զալկալիանին:

Հեռուստաընկերության տվյալներով՝ աբխազական և հարավօսական կողմերը չեն ցանկացել քննարկել Աբխազիայում և Ցխինվալի տարածաշրջանում իրենց տներ հարկադիր վերաբնակների և փախստականների վերադառնալու հարցը: «Դա այն իրավունքն է, որը ոչ ոք չի ժխտում, ներառյալ նաև այդ մասնակիցները: Ես նկատի ունեմ հարկադիր վերաբնակների վերադառնալու իրավունքը: Բայց դա քաղաքականացված ձևաչափ է»,- հայտարարել է հաշտության և քաղաքացիական իրավահավասարության առաջին փոխնախարար Քեթևան Ցիխելաշվիլին:

Ժնևի բանակցությունների հաջորդ փուլը նշանակված է հոկտեմբերի 7-8-ին:

Ժնևյան քննարկումներն անցկացվում են 2008 թվականի հոկտեմբերից այն պայմանավորվածությունների հիման վրա, որոնք Եվրամիության, ՄԱԿ-ի և ԵԱՀԿ-ի միջնորդությամբ ձեռք են բերվել Վրաստանում 2008 թվականի օգոստոսյան պատերազմից հետո: Ժնևի հանդիպումներին մասնակցում են Վրաստանի, Ռուսաստանի, ԱՄՆ-ի պատվիրակությունները, աբխազական և հարավօսական կողմերի ներկայացուցիչները, հաղորդել է «Նովոստի Գրուզիա» գործակալությունը: