Մոսկվան վրացական կողմին մեղադրել է Ժնևում «ճկուն ռեժիմով» աշխատել չկարողանալու մեջ

Մի շարք հարցերի, այդ թվում՝ ուժի չկիրառման խնդրի քննարկումը, որոնք այդպես էլ չարծարծվեցին Ժնևի միջազգային կոնսուլտացիաների հերթական փուլի ընթացքում, հետաձգվել է մինչև հոկտեմբերի սկիզբը, քանի որ Վրաստանի պատվիրակությունը պատրաստ չէ դրանք քննարկել «ճկուն ռեժիմով»: Այդ մասին հայտարարել է Ռուսաստանի արտաքին գործերի նախարարությունը:

«Աբխազիայի ու Հարավային Օսիայի պատվիրակությունները հանդես եկան Ժնևի բանակցություններում փախստականների խնդրի քննարկման աննպատակահարմարության վերաբերյալ համատեղ հայտարարությամբ այնքան ժամանակ, քանի դեռ Վրաստանը չի դադարեցնի այդ կարևոր թեմայի արհեստական քաղաքականացումը ՄԱԿ-ի Գլխավոր ասամբլեայում: Այդ կապակցությամբ Սուխումի և Ցխինվալի ներկայացուցիչներն արտահայտվեցին հումանիտար խմբի օրակարգից փախստականների վերաբերյալ կետը բացառելու օգտին»,-ասված է հուլիսի 18-ին Ժնևում կայացած բանակցությունների հերթական փուլի արդյունքների վերաբերյալ ՌԴ ԱԳ նախարարության մեկնաբանության մեջ: Գերատեսչությունում հետևում են, որ ռուսական կողմը պաշտպանել է աբխազ և հարավօսացի գործընկերների կարծիքը: Բացի այդ, հանդիպման շարունակման փոխզիջումային տարբերակ մշակելու համանախագահների փորձերը «հաջողություն չեն ունեցել»:

Մինչդեռ Վրաստանի արտաքին գործերի առաջին փոխնախարար Դավիթ Զալկալիանին Ժնևում լրագրողներին հայտարարել է, որ հանրապետության պատվիրակությունը բանակցությունների ընթացքում չի կարողացել քննարկել օրակարգով նախատեսված բոլոր հարցերը, քանի որ Աբխազիայի և Հարավային Օսիայի ներկայացուցիչները լքել են բանակցությունները դրանց սկսվելուց մի քանի րոպե անց: «Այդ ապակառուցողական գործողությունները մեզ հնարավորություն չտվեցին ամբողջությամբ քննարկել Ժնևի բանակցությունների օրակարգով նախատեսված հարցերը: Առաջին անգամը չէ, որ նման բան է տեղի ունենում: Ցավոք, որոշակի փաստեր եղել են նաև բանակցությունների այլ փուլերում»:

Ժնևի բանակցությունների հաջորդ փուլը նշանակված է հոկտեմբերի 7-8-ին:

Ժնևյան քննարկումներն անցկացվում են 2008 թվականի հոկտեմբերից այն պայմանավորվածությունների հիման վրա, որոնք Եվրամիության, ՄԱԿ-ի և ԵԱՀԿ-ի միջնորդությամբ ձեռք են բերվել Վրաստանում 2008 թվականի օգոստոսյան պատերազմից հետո: Ժնևի հանդիպումներին մասնակցում են Վրաստանի, Ռուսաստանի, ԱՄՆ-ի պատվիրակությունները, աբխազական և հարավօսական կողմերի ներկայացուցիչները, հաղորդել է «Նովոստի Գրուզիա» գործակալությունը: