Ռասմուսեն. «Մենք չպետք է ՆԱՏՕ նոր անդամներ ընդունենք ի հակակշիռ Ռուսաստանի»

ՆԱՏՕ-ն չի հրաժարվում Ռուսաստանի հետ համագործակցությունն ընդլայնելու գաղափարից և հիշեցնում է, որ դաշինքի կազմում նոր երկրներ ընդունելը Ռուսաստանի դեմ ուղղված քայլ չէ:

ՆԱՏՕ-ի գլխավոր քարտուղար Անդերս ֆոգ Ռասմուսենը հունիսի 19-ին Լոնդոնի միջազգային հարաբերությունների թագավորական ինստիտում ունեցած ելույթից հետո պատասխանելով հարցերին, նշել է, թե Ուկրաինայի իրադարձությունները, որոնք փաստորեն հանգեցրել են Ռուսաստանի հետ դաշինքի հարաբերությունների կասեցման, անդառնալի խնդիր չեն:

«Ուկրաինայում տեղի ունեցած իրադարձությունները տագնապի ազդանշան են դարձել: Այո, մենք պետք է բարձրացնենք պատրաստությունը, փոխենք սպառնալիքները գնահատելու սկզբունքները, հաշվի առնենք նոր մարտահրավերները, կատարելագործենք հետախուզությունը: Սակայն այն հարաբերությունները, որոնք մենք հաստատել ենք Ռուսաստանի հետ, բացառիկ են. գործում է Ռուսաստան-ՆԱՏՕ խորհուրդը, անցկացվել են համատեղ գագաթնաժողովներ: Մենք ՆԱՏՕ-ի կազմ նոր անդամներ չպետք է ընդունենք ի հակակշիռ Ռուսաստանի ագրեսիայի, ընդհակառակը, մենք պետք է ՌԴ-ին ներգրավենք երկխոսության և գործընկերության մեջ»,-ասել է Ռասմուսենը, հիշեցնելով, որ ՌԴ-ի և ՆԱՏՕ-ի հարաբերությունների բարձրակետը եղել է 2010 թվականին:

Դրա հետ մեկտեղ, նրա խոսքով, բոլոր երկրներն ինքնորոշվելու իրավունք ունեն, և եթե որևէ երկիր ցանկանում է «ներդրում ունենալ եվրոպական անվտանգության մեջ», ապա ՆԱՏՕ-ն նրան չի մերժում:

«ՆԱՏՕ-ն բաց դռների քաղաքականություն է վարում: Մենք ցանկացած եվրոպական երկրի իրավունք ենք տալիս իր ավանդը ներդնել եվրոպական անվտանգության ամրապնդման գործում, յուրաքանչյուր երկիր կարող է հրավիրվել՝ անդամագրվելու դաշինքին: ՆԱՏՕ-ի անդամների թվաքանակի աճը Ռուսաստանի դեմ ուղղված քայլ չէ, դա համապատասխանում է նաև հենց Ռուսաստանի շահերին»,-ասել է գլխավոր քարտուղարը, հաղորդել է ՌԻԱ Նովոստին: