Ավստրիացիների 70 տոկոսը դեմ է Էրդողանի` Ավստրիա այցին

Ավստրիացիների 70 տոկոսը դեմ են, որ Թուրքիայի վարչապետ Ռեջեբ Թայիբ Էրդողանն այցելի Ավստրիա: Այս մասին, հայտնում է ավստրիական Kurier am Feiertag թերթը:

Թերթն իր` «Որպես նախընտրական քարոզարշավի քարոզիչ` բարով չես եկել» վերնագրված հոդվածում նշում է, որ 10 հազարից ավելի մարդ ցանկություն է հայտնել դուրս գալ Էրդողանի այցի դեմ բողոքի: Թերթը Էրդողանին բնութագրել է որպես «հզոր կոկորդով մարդ»:

Ավստրիական Bulvar թերթը Թուրքիայի վարչապետի առաջիկա այցին նվիրված հոդվածում գրել է. «Սուլթան Էրդողանի քարոզչական շոուն»: Osterreich թերթն էլ գրում է, որ Թուրքիայի վարչապետի այցի առնչությամբ երկրում խստացվել են անվտանգության միջոցառումները, որոնց ավելի քան 2000 ոստիկաններ են ներգրավվել:

Ավստրիայի 28-ամյա արտաքին գործերի նախարար Սեբաստիան Կրուզը Թուրքիայի վարչապետ Էրդողանին բացահայտ կերպով զգուշացրել է, որ չի կարող մասնատել ավստրիական հասարակությանը: Կրուզի այդ հայտարարությունը մեծ արձագանք էր գտել Թուրքիայում, իսկ թուրքական մամուլն այն բնութագրել են որպես սադրանք:

Ավստրիական Osterreich թերթին տված հարցազրույցում Կրուզը զգուշացրել է Էրդողանին, թե նա ինչպես պետք է խոսի իր հայրենակիցների հետ առաջիկա օրերին Ավստրիա կատարելիք այցի ժամանակ:

«Բացահայտ կերպով զգուշացնում եմ Էրդողանին, որ չի կարող մասնատել ավստրիական հասարակությանը: Ինտեգրումն զգայուն խնդիր է: Սխալ խոսքը մեզ հետ է տանում և թունավորում մթնոլորտը: Էրդողանի պատասխանատվությունը կայանում է նրանում, որ այստեղի թուրքերին խորհուրդ տա սովորել գերմաներեն և հավատարիմ լինել Ավստրիային: Իսկ եթե նա խոսի այնպես, ինչպես Գերմանիայում էր խոսել, դա միայն կվնասի ավստրիաբնակ թուրքերին»,- ասել է Ավստրիայի ԱԳՆ ղեկավարը:

Էրդողանը մարտի սկզբին Քյոլն կատարած այցին Գերմանիայի թուրքական համայնքի հետ հանդիպման ժամանակ բացահայտ կերպով զբաղվել էր օգոստոսին Թուրքիայում տեղի ունենալիք նախագահական ընտրություններում իր թեկնածությունը պաշտպանելու օգտին քարոզչությամբ: Իսկ անցյալ տարի պաշտոնական այցով Գերմանիա կատարած այցին գերմանաբնակ թուրքերին խորհուրդ էր տվել օգտվել գերմանական արժեքներից, ինտեգրվել գերմանական հասարակությանը, բայց աշխատել Թուրքիայի օգտին: