Քննարկվել է «Նոյեվ կովչեգ» թերթում հայերեն բաժին ստեղծելու հնարավորությունը

ՀՀ սփյուռքի նախարար Հրանուշ Հակոբյանն ընդունեց «Նոյեվ կովչեգ» թերթի հիմնադիր և գլխավոր խմբագիր Գրիգոր Անիսոնյանին

Ապրիլի 5-ին ՀՀ սփյուռքի նախարար Հրանուշ Հակոբյանն ընդունեց Մոսկվայում հրատարակվող «Նոյեվ կովչեգ» թերթի հիմնադիր և գլխավոր խմբագիր Գրիգոր Անիսոնյանին:

Քննարկվեցին Սփյուռքի լրատվամիջոցների հիմնախնդիրների վերաբերյալ հայ լրագրողների 5-րդ համահայկական համաժողովում բարձրացված հարցերի լուծման նպատակով իրականացվող ծրագրերը, ինչպես նաև այս տարվա հոկտեմբերի 4-6-ը կազմակերպվելիք հայ լրագրողների 6-րդ համահայկական համաժողովի նախապատրաստական աշխատանքներին առնչվող հարցեր:

Հ. Հակոբյանը ներկայացրեց ՀՀ սփյուռքի նախարարության առաջիկա ծրագրերը: Պայմանավորվածություն ձեռք բերվեց առավել ակտիվ համագործակցել ՀՀ սփյուռքի նախարարության ծրագրերի և միջոցառումների վերաբերյալ տեղեկատվությունը Սփյուռքի համայնքներին հասանելի դարձնելու ուղղությամբ:

Հանդիպման ընթացքում քննարկվեց նաև ռուսերենով հրատարակվող «Նոյեվ կովչեգ» թերթում հայերեն բաժին ստեղծելու հնարավորությունը: