Որոշել են՝ անդամակցել

Հայազգի պրոֆեսոր, Միացյալ Թագավորության լորդերի պալատի անդամ Լորդ Արա Դարզին և «Գլոբալ Մեդիքալ Սոլյուշնս» ընկերության նախագահ և գլխավոր գործադիր տնօրեն Հայկ Բաքրջյանը ընդունել են ՀՀ վարչապետ Տիգրան Սարգսյանի հրավերը՝ անդամակցելու Հայաստանի ազգային մրցունակության հիմնադրամի հոգաբարձուների խորհրդին:

Լորդ Արա Դարզի

Բժշկության և վիրաբուժության զարգացման գործում ունեցած մեծ ավանդի համար 2002 թվականին Արա Դարզիին շնորհվել է բրիտանական կայսրության Ասպետի կոչում: Արա Դարզին Միացյալ Թագավորության Լորդերի պալատ է անդամ է դարձել 2007 թվականին՝ ստանալով Դանհամի Լորդի տիտղոսը: 2007-ից մինչև 2009 թվականը նա պաշտոնավարել է որպես Լորդերի պալատի կողմից նշանակված Միացյալ Թագավորության Առողջապահության նախարար: Նույն թվականին նա նշանակվել է Միացյալ Թագավորության առողջապահության և կենսագիտության համաշխարհային դեսպան, իսկ 2010 թվականին՝ վարչապետ Դեյվիդ Քեմերոնի կողմից վերահաստատվել նույն պաշտոնում: 2009 թվականի հունիսին Լորդ Դարզին նշանակվել է Մեծ Բրիտանիայի և Հյուսիսային Իռլանդիայի թագուհի Նորին Մեծություն Եղիսաբեթ Երկրորդի վստահորդների խորհրդի (Privy Council) անդամ:

Հայկ Բաքրջյան

Պարոն Բաքրջյանը հանդիսանում է «Գլոբալ Մեդիքալ Սոլյուշնս» ընկերության նախագահ և գլխավոր գործադիր տնօրեն: «Գլոբալ Մեդիքալ Սոլյուշնս»-ը միջուկային բժշկության և ախտորոշիչ պատկերման ծառայությունների համաշխարհային առաջատար ընկերություններից մեկն է: Ընկերությունը գործունեություն է ծավալում Ավստրալիայում, Բրազիլիայում, Չինաստանում, Հոնգ Կոնգում, Նոր Զելանդիայում, Ֆիլիպիններում, Թայվանում և Թայլանդում: Ընկերությանը պատկանում են բազմաթիվ ռադիոիզոտոպների արտադրություն և ռադիոնուկլիդների դեղաբաշխական կենտրոններ, ինչպես նաև միջուկային բժշկության ծառայությունների մատուցման հաստատություններ: Պարոն Բաքրջյանը հանդիսանում է նաև Լոս Անջելեսի Օպերայի տնօրեն:

Հայաստանի ազգային մրցունակության հիմնադրամի Հանրային կապերի գրասենյակ