Մեկնարկել է «Գրողների համահայկական վեցերորդ համաժողովը»

Ապրիլի 20-ին «Առնո Բաբաջանյան» համերգասրահում կայացավ ՀՀ սփյուռքի նախարարության և Հայաստանի գրողների միության նախաձեռնությամբ կազմակերպված «Գրողների համահայկական վեցերորդ համաժողովի» բացման հանդիսավոր արարողությունը:

Համաժողովին մասնակցումն է շուրջ 100 գրող' Հայաստանից, Արցախից և Սփյուռքից, այդ թվում շուրջ 60 սփյուռքահայ պատվիրակ 21 երկրից (ԱՄՆ, Սիրիա, Թուրքիա, Լիբանան, Իրան, Մեծ Բրիտանիա, Կիպրոս, Կանադա, Ռումինիա, Ֆրանսիա, Շվեյցարիա, Գերմանիա, Եգիպտոս, Արգենտինա, Իսրայել, Ավստրալիա, Վրաստան, Լիտվա, Ռուսաստանի Դաշնություն և այլն):

Ամենայն Հայոց Կաթողիկոս Ն.Ս.Օ.Տ.Տ. Գարեգին Բ-ի ուղերձը համաժողովի մասնակիցներին փոխանցեց Մայր Աթոռ Սուրբ Էջմիածնի հրատարակչության տնօրեն Գերաշնորհ Տեր Նաթան եպիսկոպոս Հովհաննիսյանը:

Մեծի Տանն Կիլիկիո Կաթողիկոս Ն.Ս.Օ.Տ.Տ. Արամ Ա-ի ողջույնի ուղերձը համաժողովի մասնակիցներին ընթերցեց Մեծի Տանն Կիլիկիո Կաթողիկոսության դիվանապետ Խաչիկ Դեդեյանը:

Ջերմորեն ողջունելով համաժողովի մասնակիցներին' ՀՀ սփյուռքի նախարար Հրանուշ Հակոբյանը խորհրդանշական համարեց, որ «Իմ Հայաստան» համահայկական փառատոնը մեկնարկում է հենց «Գրողների համահայկական վեցերորդ համաժողով»-ով, և համաժողովը տեղի է ունենում այն օրերին, երբ ողջ հայ ժողովուրդը տոնախոմբում է հայ գրատպության 500-ամյակը: Նախարարը նշեց երեք հիմնախնդիր, որոնց լուծման առաջամարտիկներից է հայ գրողը: Դրանք են' Սփյուռքում նահանջ ապրող ոսկեղենիկ մայրենիի պահպանումը, Հայոց Ցեղասպանության ճանաչման, դատապարտման և հետևանքների վերացման համար պայքարը և 20-ամյա Հայաստանի Հանրապետության հզորացումը, Սփյուռքը Հայաստանակենտրոն դարձնելու, ինչպես նաև Հայաստանի շուրջ համախմբելու կարևորգույն խնդիրները: Շնորհակալություն հայտնելով հայ գրողներին' Հ.Հակոբյանը մաղթեց բազմաբեղուն ստեղծագործական ուղի:

Երևանի քաղաքապետ Տարոն Մարգարյանի ողջույնի խոսքն ընթերցեց Երևանի քաղաքապետարանի աշխատակազմի հանրակրթության վարչության պետ Գ.Սողոմոնյանը:

Համաժողովի մասնակիցներին ողջունեցին Հայաստանի գրողների միության նախագահ Լևոն Անանյանը և Արցախի գրողների միության նախագահ Վարդան Հակոբյանը:

Նախարար Հ.Հակոբյանը հրապարակեց ՀՀ վարչապետ Տիգրան Սարգսյանի որոշումը, որով մի խումբ սփյուռքահայեր «Մայրենի լեզվի օր» տոնի առթիվ պարգևատրվում էին ՀՀ վարչապետի հուշամեդալով: Նախարարը ՀՀ վարչապետի հուշամեդալներ հանձնեց բանաստեղծ, արձակագիր, հրապարակախոս Համբիկ Մարտիրոսյանին (Լիբանան), գրող, «Բագին» ամսագրի խմբագիր Հակոբ Պալյանին (Ֆրանսիա), բանաստեղծուհի «Անդրադարձ» թերթի խմբագիր Անուշ Նագգաշյանին (Իսրայել):

Համաժողովի մասնակիցներին ողջունեցին նաև սփյուռքահայ գրողներ' խմբագիր, մշակութային գործիչ Ժիրայր Դանիելյանը, արձակագիր, բանաստեղծ, հրապարակախոս, մշակութային գործիչ Թորոս Թորանյանը, Իրանահայ գրողների միության նախագահ Թորգոմ Տեր-Հակոբյանը, արձակագիր, դրամատուրգ Խորեն Արամունին, Վրաստանի հայ գրողների «Վերնատուն» միության նախագահ Գևորգ Սնխչյանը և այլք:

Միջոցառման պաշտոնական մասին հաջորդեց համերգային ծրագիրը: Գեղեցիկ կատարումներով հանդես եկան ՀՀ ժողավրդական արտիստ Ազատ Գասպարյանը, ՀՀ վաստակավոր արտիստ Ռուբեն Սահակյանը և «Ծաղկազարդ» համախումբը: