Ի՞նչ կտա Հայաստանին Պուտին-Օբամա հաշտեցումը

Նյու Յորքում տեղի ունեցավ ԱՄՆ նախագահ Բարաք Օբամայի և Ռուսաստանի նախագահ Վլադիմիր Պուտինի՝ վերջին 2 տարվա ընթացքում առաջին երկկողմ հանդիպումը: Նախագահների քննարկման հիմնական թեման եղել է Ուկրաինայի իրավիճակի կարգավորման և սիրիական խնդիրը:

ԼՈւՐԵՐ.com-ի թղթակցի հետ զրույցում իրանագետ Վարդան Ոսկանյանը նկատեց, որ այդ հանդիպման պայմանավորվածությունները դեռևս հստակ չեն, բայց փաստը, որ հարաբերությունների ամենացածր մակարդակում գտնվող երկու պետությունների ղեկավարները հանդիպեցին և առանձնազրույց ունեցան, շատ կարևոր է:

«Տեղի է ունենում շրջադարձային գործընթաց. փաստացիորեն Ռուսաստանն օգտագործում է սիրիական խաղաքարտը՝ ամրապնդելու իր դիրքերը: Ռուսաստանը ձգտում է կա՛մ Սիրիայում ամրապնդած դիրքերը հետագայում փոխանակել Ուկրաինայի թուլացած դիրքերի հետ, կա՛մ, իրոք, ձգտում է Մերձավոր Արևելքում ամրապնդել իր ներկայությունը՝ ստեղծելով նոր դաշինք, որին իրենց մասնակցությունն են բերում ոչ միայն Սիրիայի իշխանությունները, այլև Իրանը: Այս համատեքստում հետաքրքրական է, որ համակարգող մարմինն ստեղծվել է Բաղդադում՝ մի երկրում, որտեղ արդեն երկար տարիներ ամերիկյան ներկայությունը վճռորոշ է, այսինքն՝ Ռուսաստանը մուտք է գործում ամերիկյան շահերի ոլորտ»,- ասաց Վարդան Ոսկանյանը:

Նա նկատեց նաև, որ դեռևս շատ դժվար է ասել՝ ինչպես կզարգանան իրադարձությունները՝ երկու կողմերը կգա՞ն կոնսեսուսի, թե՞ ոչ: Հիմնական մեխը Բաշար Ալ Ասադի ճակատագիրն է. ռուսական կողմը գտնում է, որ Սիրիայի իշխանությունները պետք է կազմեն կոալիցիոն ուժերի մաս, իսկ ԱՄՆ-ն վերապահումներ ունի Բաշար Ալ Ասադի կապակցությամբ՝ չնայած ամերիկյան դիրքորոշումը վերջին շրջանում շատ դինամիկ է:

«Ընդհանուր առմամբ, Մերձավոր Արևելքում երկուստեք շահերի բախում կա, բայց կա մի կարևոր հանգամանք՝ միջազգային ահաբեկչությունը, որի դեմ պայքարում ԱՄՆ-ն և Ռուսաստանը շահագրգիռ են: Այստեղ հակասությունը լինելու է դափնիների հարցում, թե ով կստանա դափնիներն ահաբեկչության դեմ պայքարում՝ հաջողություն գրանցելու դեպքում»,- նկատեց մեր զրուցակիցը:

Վարդան Ոսկանյանի գնահատմամբ՝ մեզ համար ձեռնտու է Ռուսաստան-ԱՄՆ հակամարտության թուլացումը և հարաբերությունների նորմալացումը, քանի որ Հայաստանը մի կողմից դաշնակցային հարաբերություն ունի Ռուսաստանի, մյուս կողմից էլ՝ բարձր մակարդակով քաղաքական հարաբերություն ունի ԱՄՆ-ի հետ: Բնականաբար, այս երկու կենտրոնների հաշտեցումը մեզ համար ձեռնտու կլինի: