Անկարայում տեղի է ունեցել Այվազովսկու «կենդանի» կտավների ցուցահանդեսի շնորհանդեսը

Անկարայում սեպտեմբերի 30-ին տեղի է ունեցել Հովհաննես Այվազովսկու «կենդանացած» կտավների ցուցահանդեսի շնորհանդեսը, տեղեկացնում է «Արմենպրես»-ը:

Աշխարհահռչակ ծովանկարչի շուրջ 400 կտավներ «կենդանացվել» են համակարգչային գրաֆիկայի օգնությամբ, որոնք մոդելավորված են ալեբախության ձայներով, ճայերի ճիչերով և ուղեկցվում են երաժշտությամբ: Նախագծի նախաձեռնողն ու հովանավորն է դարձել Այվազովսկու ստեղծագործության մեծ երկրպագու, Թուրքիայի խոշորագույն հրատարակչական տներից մեկի՝ Boyut Publishing-ի տնօրեն Բյուլենթ Օզյուքանը, իսկ ղեկավարը՝ հայտնի կոմպոզիտոր և դաշնակահարուհի Անժելիկա Աքբարը, որը խորհրդային երաժշտական դպրոցի սան է: Նա ծնվել է Ղազախստանում, երաժշտական կրթությունն ստացել է Տաշքենդի կոնսերվատորիայում, այժմ ապրում և աշխատում է Ստամբուլում:

«Այվազովսկու կտավները, որոնք կանդանացվել են ժամանակակից մուլտիմեդիական տեխնոլոգիաների օգնությամբ, մենք մեծ կինոդահլիճի էկրանին ցուցադրելու ենք 600 քառակուսի մետր մակերեսով շենքում: Ցուցադրությունն ուղեկցվելու է գեղանկարչի վերաբերյալ բազմալեզու տեղեկատվությամբ և այն երկրների ժողովրդական երաժշտությամբ, որտեղ ապրել և ստեղծագործել է գեղանկարիչը, ինչպես նաև իմ սեփական կոմպոզիցիաներով: Հուսով եմ, որ դա թույլ կտա Այվազովսկու ստեղծագործության հետ ծանոթացնել երեխաներին ու երիտասարդությանը և նրա ստեղծագործության նոր եզրեր բացել արվեստի սիրահարների համար»,-ՌԻԱ Նովոստիին ասել է Աքբարը:

Ցուցահանդեսի շնորհանդեսը տեղի կունենա նաև նկարչի հայրենիքում՝ Թեոդոսիայում (հոկտեմբերի 8-ին), Նյու Յորքում (հոկտեմբերի 15-ին), Երևանում (հոկտեմբերի 24-ին): 2016 թվականի հունվարի 8-ից ցուցահանդեսը վեց ամսով կհանգրվանի Ստամբուլի ծովային թանգարանում: 2017 թվականին, հովանավորչական աջակցության դեպքում, այս ցուցահանդեսը պլանավորվում է անցկացնել Սանկտ Պետերբուրգում: