Պոլսահայերը գումար են հավաքել Վանի երկրաշարժից տուժածների համար

Պոլսահայերը քառասուն հազար թուրքական լիրա են հավաքել Վանի երկրաշարժից տուժածներին օգնություն տրամադրելու համար։ Պոլսի պատրիարքարանի հոգևոր խորհրդի առաջնորդ Թաթուլ արքեպիսկոպոս Անուշյանն անձամբ է հավաքել պոլսահայության տրամադրած գումարը։ Ինչպես հաղորդում է Պոլսո պատրիարքարանի մամլո ծառայությունը, Անուշյանը հանդիպել է Վանի փոխնահանգապետ Աթար Ուսլուի հետ և նրան փոխանցել պոլսահայերի հանգանակած քառասուն հազար լիրան։ Հիշեցնենք, որ Վանում հոկտեմբերի 23-ին տեղի էր ունեցել 7.2 մագնիտուդով ավերիչ երկրաշարժ, ինչի ադյունքում զոհվել էր ավելի քան հինգ հարյուր մարդ, հազարավորները մնացել էին անօթևան։ Երկրաշարժը 3-5 բալ ուժգնությամբ զգացվել էր նաև Հայաստանում։ Աղետից ավելի քան երկու շաբաթ է անցել, բայց ուժեղ հետցնցումները դեռևս շարունակվում են։