Վրաստանում ցեղասպանության ճանաչման հարցում մոտ ապագայում առաջընթաց չի լինի. փորձագետ

«Կհորդորեի Վրաստանի հայ համայնքին, որ ավելի ակտիվացնեն իրենց գործողություններն ու ավելի համախմբած աշխատեն հայոց ցեղասպանությունը Վրաստանում ճանաչելու հարցի ուղղությամբ», - այսօր լրագրողների հետ հանդիպման ժամանակ հայտարարեց Վրաստանի հարցերով փորձագետ Ալիկ Էրոյանցը:

«Նման դրսևորումներ էլի կլինեն, պետք է հակազդել: Ադրբեջանցիները նախօրոք պատրաստված էին ու գիտեին, որ այդ հարցը հնարավոր է՝ բարձրացվեր, քանի որ այդ միջադեպից մի քանի րոպե անց խորհրդարանի առջև հավաքվեցին վրաստանաբնակ ադրբեջանցի ուսանողներ՝ «Ջոնդի Բագատուրիան վաճառվեց» բովանդակությամբ պաստառներով: Բացի այդ, այդ օրը Վրաստանի խորհրդարանում ներկա էին ադրբեջանական երեք-չորս ԶԼՄ-ների ներկայացուցիչներ»,- նկատեց Էրոյանցը:

Ալիկ Էրոյանցի կարծիքով` այս հարցում դրական առաջընթաց մոտ ապագայում չի լինի`  նկատի ունենալով վրաց-ադրբեջանական հարաբերությունների մակրադակը, թուրք-ադրբեջանական գործոնի ազդեցությունը Վրաստանում:

«Այս հարաբերություններում բացասական փոփոխության դեպքում կարելի է որոշ չափով իրատեսական համարել, նաև եթե Վրաստանում իշխանափոխություն լինի ու իշխանությունները վերանայեն իրենց արտաքին քաղաքականությունը»,- ընդգծեց փորձագետը:

Հիշեցնենք, որ վերջերս Վրաստանի խորհրդարանում վիճաբանություն է տեղի ունեցել, երբ պատգամավոր Ջոնդի Բագատուրիան խոսել է Հայոց ցեղասպանության ճանաչման անհրաժեշտության մասին: Ադրբեջանցի պատգամավոր Ազեր Սուլեյմանովը Բագատուրիայի ուղղությամբ ինչ-որ առարկա է նետել և խափանել նրա ելույթը: