Սփյուռքում փորձում են փրկել արևմտահայերենը

Սփյուռքում արագացող ուծացման պայմաններում արևմտահայերենը հայտնվել է օրհասական վիճակում։ 2010 թվականին ՅՈՒՆԵՍԿՕ–ն արևմտահայերենն ընդգրկել էր առավել վտանգված լեզուների ցանկում։

Այս մտահոգութամբ օգոստոսին կայացած համագումարում որոշվել էր ստեղծել «Արևմտահայերենի փրկության խորհուրդ», որի կենսագործման ճանապարհին առաջին քայլն է ձեռնարկել Մեծի Տանն Կիլիկիո Արամ Ա կաթողիկոսը։ Երեքշաբթի օրը Անթիլիասի Մայրավանքում նրա հրավերով և նախագահությամբ տեղի է ունեցել խորհրդի ձևավորման գործընթացը քննարկող հանդիպում, որին հրավիրված էին հայկական երեք եկեղեցիների, Համազգային հայ կրթական և մշակութային միության, «Թեքեյան» և «Նոր Սերունդ» մշակութային միությունների ներկայացուցիչները։

Արձանագրելով, որ արևմտահայերենը ճգնաժամի մեջ է և դիմագրավում է լուրջ փորձությունների՝ Արամ Ա–ն ասել է, որ բավական չէ պարզապես արևմտահայերենի առջև ծառացած խնդիրները նկարագրելը, պետք է անցնել գործի և մտածել արևմտահայերենը պաշտպանելու ազդեցիկ միջոցներ գտնելու մասին։ Կաթողիկոսը նշել է նաև, որ այդ աշխատանքները պետք է կատարվեն համահայկական և համասփյուռային մակարդակով, ինչի համար էլ հենց հրավիրվել են նաև ամբողջ Սփյուռքում իրենց կառույցներն ունեցող մշակութային միությունների և եկեղեցիների ներկայացուցիչները։ 

Այս խորհրդակցական հանդիպմանը հաջորդելու է «Արևմտահայերենի պաշտպանության խորհրդի» հիմնական կազմի ձևավորումը, որն էլ առաջնահերթորեն պիտի պատրաստի խորհրդի աշխատանքների ծրագիրը։