Դմիտրի Ալենիչևը՝ Ռուբեն Հայրապետյանի՝ Մովսիսյանին հավաքական չհրավիրելու որոշման մասին

Մոսկվայի «Սպարտակի» գլխավոր մարզիչ Դմիտրի Ալենիչևը sport-express-ին տված ծավալուն հարցազրույցում խոսել է նաև Յուրա Մովսիսյանի՝ Հայաստանի հավաքական չհրավիրվելու մասին: Հարցազրույցից հատված ներկայացնում ենք ստորև.

- Յուրա Մովսիսյանի մասին, ով արդեն «Սպարտակում» չէ, ՀՖՖ-ի նախագահը հայտարարել է, որ ազգային ընտրանիում նա չի լինելու: Ձեզ համար սա անսպասելի՞ էր:

- Իմ ունեցած տեղեկությունների համաձայն՝ Յուրան հավաքականում ամբողջ ուժերը չէր ներդնում, բայց չէ՞ որ հավաքականում խաղալը մեծ պատասխանատվություն է: Եթե գալիս ես ազգային հավաքական և չես ներկայացնում քեզ հարյուր տոկոսով, ապա, իհարկե, ղեկավարությունն իրավունք ունի որոշակի որոշումներ կայացնել, այդ թվում նաև՝ կոշտ որոշումներ, ինչպես՝ այս դեպքում: Ուրեմն պատճառ եղել է: Քննարկելու ոչինչ չկա: Հայ մարզիչը, ինչպես և Սլուցկին, պետք է որոշի, թե ում հրավիրել: Հիմա ամեն ինչ կախված է Յուրայից: Եթե նա ցանկանում է վերադառնալ, ապա պետք է ապացուցի դա դաշտում:

- Ստացվում է, որ սա ևս մեկ անգամ հաստատո՞ւմ է այն, որ ակումբը Մովսիսյանի վարձավճարով տեղափոխության հարցում ճիշտ էր:

- Ինչպես արդեն ասել եմ, չեմ տեսել նրա մոտ բարձր մոտիվացիա, որը կար «Սպարտակում»՝ նրա կարիերայի սկզբում: Հենց դրա համար էլ մենք վարձավճարով տեղափոխության որոշում կայացրինք: