Հայ և արտասահմանցի մասնագետները կշարունակեն պեղել Հայաստանի հնավայրերը

Հայաստանն ակտիվ համագործակցություն կծավալի արտերկրյա խմբերի հետ' պեղումներ կատարելու երկրի տարածքում: «Արմենպրես»-ի հետ զրույցում ՀՀ ԳԱԱ Հնագիտության և ագգարության ինստիտուտի տնօրեն Պավել Ավետիսյանը տեղեկացրեց, որ այս տարի ևս նախատեսվում է այլ երկրների խմբերի հետ համատեղ ծրագրեր իրականացնել:

«Այս տարի կշարունակվի հայ-իտալական ծրագիրը, որը արդեն սկսել է աշխատանքները, երկու տարի պեղումներ են արվում Սոլակ գյուղի մոտ: Վանի թագավորության շրջանի ինչ-որ կառույց ենք բացում, ուզում ենք ֆենոմենը հասկանալ: Եղած նյութերը ցույց են տալիս, որ Վանի թագավարության պատմության մասին վկայող հուշարձանների մեջ մի նոր տեսակ ենք արձանագրելու, և այդ տեսակից կորզված տվյալները կլրացնեն ժամանակաշրջանի մասին մեր պատկերացումները»,-նշեց նա:

Բացի այդ, Մասիս բլուր հնավայրում հայ-ամերիկյան արշավախումբը կաշխատի, իսկ Ակնաշենում վերջին շրջանում հայ -ֆրանսիական արշավախումբ է գործունեություն ծավալում:

«Շատ մեծ մի արշավախումբ կգա և կաշխատի Արագածի հյուսիսարևելյան փեշերին: Հայ-ամերիկյան արշավախումբ է, տարբեր համալսարաններից են գալիս: Ապարանի բերդում կկենտրոնացնենք աշխատանքները»,-ընդգծեց Պավել Ավետիսյանը:

Հնագիտության և ագգարության ինստիտուտի տնօրենի խոսքով' պեղումները հիմնականում իրականացվում են հունիսին, և եթե տարածքը խոնավ է լինում, հնագետները չեն կարող աշխատել: Նա նաև կարևորեց արտերկրի լաբորատորիաների և գիտական կենտրոնների հետ համագործակցությունը' հատուկ շեշտելով, որ շնորհակալ է Հայաստանի իշխանություններին' աշխատանքները գնահատելու և իրենց աջակցելու համար: