Խմբագրական. Մեր քաղաքական դաշտում սա առաջընթաց է

4+4+4 ձևաչափով քննարկումներն արդեն ընթացքի մեջ են, և իմ կարծիքով՝ սա ամենաարդյունավետ ձևաչափն էր, որը կարող էր կիրառվել այս դեպքում: Փաստորեն, որքան էլ անհավատալի լինի՝ ՀԱԿ-ի կողմից նույնպես կարող են հնչել կառուցողական առաջարկներ, որոնց իրականացումը կարող է բերել դրական արդյունքների: Ողջունելի է նաև, որ նույնիսկ ՀԱԿ պատգամավորները քննարկումներն առայժմ վարում են ողջամտության սահմաններում՝ փորձելով գալ համաձայնության մյուս կողմի հետ: Նույնիսկ ՀԱԿ պատգամավոր Արամ Մանուկյանը լրագրողների հետ հանդիպման ժամանակ ասել է, թե իրենց համար առաջնայինը «հանրապետականին փաստարկված կոմպրոմիսի բերելն» է:

Իհարկե, Մանուկյանը չի կարողացել հրաժարվել նաև ՀԱԿ-ին բնորոշ ոճից և նորից ասել, թե բանակցություններով հաջողության չգալու դեպքում իրենք կարող են հանրահավաքներով ճնշում գործադրել իշխանությունների վրա, բայց այդքանով հանդերձ՝ միևնույն է, մեր քաղաքական դաշտում սա առաջընթաց է, դրական քայլ, որ ՀԱԿ-ը և ՀՀԿ-ն փոխադարձ վիրավորանքների ու ծայրահեղ բնույթի հայտարարությունների փոխարեն նստում են մի սեղանի շուրջ և կառուցողական քննարկում վարում: Հուսով եմ՝ քննարկումներն այս ոճով էլ կշարունակվեն և մենք ականատեսը կլինենք դրանց դրական արդյունքների:

Ինչ վերաբերում է ճնշումներ գործադրելու պահին, ապա նման հայտարարությունները պարզապես կարող են անլրջացնել գործընթացը, մանավանդ այսօր պարզից էլ պարզ է, որ մեր ընդդիմադիր քաղաքական ուժերն այնքան սպառված են, որ նրանցից ոչ մեկն իրականում հնարավորություն չունի իշխանության վրա ճնշում գործադրելու, թեկուզ՝ հանրահավաքների միջոցով: Միակ ուժը, որ այսօր ի զորու է իշխանության վրա ճնշում գործադրել և հանրահավաքների միջոցով թեկուզ սոցիալական բնույթի հարցեր լուծելու, ժողովուրդն է, հասարակությունը, որը որևէ ուժի կողմից ուղղորդված չլինելու դեպքում կարող է ճնշումներով հասնել արդյունքի, ինչի նախադեպերն արդեն ունեցել ենք:

Կարեն Վարդանյան