Հայ ըմբիշները oլիմպիական ընդամենը մեկ ուղեգիր նվաճեցին սերբական մրցաշարում

Սերբիայի Զրենյանին քաղաքում ապրիլի 15-17-ը կայացած ըմբշամարտի Օլիմպիական խաղերի վարկանշային մրցաշարում Հայաստանի պատվիրակներին այդպես էլ չհաջողվեց 1-ից ավելի օլիմպիական ուղեգիր ստանալ: Ապրիլի 17-ին՝ մրցաշարի վերջին խաղային օրը, մր ցագորգ էին դուրս եկել երկու հայ ըմբիշներ՝ ազատ ոճում 97 կգ քաշային Էդգար Ենոքյանը և հունահռոմեական ոճում 130 կգ քաշային Էդգար Խաչատրյանը:

Երկու ըմբիշներն էլ մրցաշարին մասնակցում էին որակավորման փուլից, որի հաղթահարումն այդպես էլ անհասանելի մնաց նրանց համար: Ենոքյանը հավասար պայքարում պարտվեց ռումինացի մրցակցին՝ Միխայել Մանեային, իսկ Խաչատրյանը 0-5 հաշվով զիջեց հունգարացի Բալինտ Լամին:

Հայաստանի ըմբշամարտի տղամարդկանց հավաքականը Սերբիա էր ժամանել 9 մարզիկներով, որոնցից 5-ը ազատ ոճայիններ էին, 4-ը՝ մրցելու էին հունահռոմեական ոճում: Ազատ ոճային ըմբիշ 57 կգ քաշային Գառնիկ Մնացականյանը դարձավ միակ ներկայացուցիչը, ում հաջողվեց Օլիմպիական ուղեգիր ձեռք բերել: Ըմբիշը եզրափակչում թեև պարտվեց մրցակցին, սակայն ըստ մրցաշարի կանոնակարգի՝ նվաճեց բաղձալի օլիմպիական վարկանիշը Հայաստանի ըմբշամարտի հավաքականի համար:

Ազատ ոճային 65 կգ քաշային Դավիթ Սաֆարյանը կարողացավ բրոնզե մեդալ նվաճել, սակայն անգամ 3-րդ տեղն օլիմպիական ուղեգիր չէր տալիս: Ազատ ոճում 74 կգ քաշային Սուրեն Խաչատրյանը պարտվեց 3-րդ տեղի համար պայքարում, իսկ անհաջող հանդես եկած 86 կգ քաշային Մուսա Մուրթազալիևը և 97 կգ քաշային Էդգար Ենոքյանը չկարողացան տպավորիչ արդյունքների հասնել՝ դուրս մնալով մրցաշարի որակավորման փուլից:

Հունահռոմեական ոճում լավագույն արդյունքը ցուցաբերեց 75 կգ քաշային Կարապետ Չալյանը, ում հաջողվեց 3-րտ տեղը գրավել: Իր ուժերից ցածր հանդես եկավ 59 կգ քաշային Ռոման Ամոյանը, ով չնայած հաղթահարեց որակավորման փուլի արգելքը, սակայն պարտություն կրեց 1/8 եզրափակչում: 66 կգ քաշային կարգում Հայաստանը ներկայացուցիչներ չուներ, սակայն ազգությամբ հայ երկու ըմբիշներ մրցում էին Ուկրաինայի և Ֆրանսիայի դրոշների ներքո: 85 կգ քաշային կարգում քառորդ եզրափակչում պարտված Մաքսիմ Մանուկյանը ցավալիորեն պարտվեց նաև սփոփիչ մենամարտում՝ չստանալով 3-րդ տեղի համար պ այքարելու իրավունք: 130 կգ քաշային Էդգար Խաչատրյանն անգամ որակավորման փուլի արգելքը չհաղթահարեց՝ հնարավորություն տալով մրցակցին շարունակելու պայքարը մրցաշարում:

Այսպիսով՝ Հայաստանի ըմբշամարտի հավաքականը Սերբիայից վերադառնում է օլիմպիական ընդամենը մեկ ուղեգրով, 1 արծաթե և 2 բրոնզե մեդալներով: