Սփյուռքի նախարարության՝ 2012 թ.-ի գերակա խնդիրները

Նոյեմբերի 11-ին կայացավ ՀՀ սփյուռքի նախարարին առընթեր ատյանի հեթական նիստը, որը վարում էր ՀՀ սփյուռքի նախարար Հրանուշ Հակոբյանը:

Օրակարգում ընգրկված էին ՀՀ անկախության 20-ամյակին նվիրված ՀՀ սփյուռքի նախարարության միջոցառումների արդյունքների, ՀՀ սփյուռքի նախարարության 2012 թ.–ի բյուջեի նախագծի, ՀՀ սփյուռքի նախարարության պատվերով «Նորավանք» գիտակրթական հիմնադրամի կողմից իրականացվող գիտական հետազոտությունների կատարման վերաբերյալ հարցերը, ՀՀ սփյուռքի նախարարության աշխատակազմի համահայկական, միջազգային և եկեղեցական կառույցների հետ կապերի վարչության հաշվետվությունը և ընթացիկ այլ հարցեր:

ՀՀ սփյուռքի նախարարության աշխատակազմի ԱՊՀ հայ համայնքների վարչության պետ Ա. Արշակյանը զեկուցեց ՀՀ անկախության 20-ամյակին նվիրված ՀՀ սփյուռքի նախարարության միջոցառումների արդյունքների վերաբերյալ: Հայաստանի Հանարապետությունում և Սփյուռքի հայ համայնքներում ՀՀ սփյուռքի նախարարության կողմից իրականացվել են չորս տասնյակից ավելի ծրագրեր և միջոցառումներ, որոնք լայն արձագանք են գտել մեր հայրենակիցների շրջանում:

ՀՀ սփյուռքի նախարարության՝ 2012 թ.–ի բյուջեի նախագծի վերաբերյալ զեկուցեց ՀՀ սփյուռքի նախարարության աշխատակազմի ֆինանսական բաժնի պետ Հ. Հովսեփյանը: 2012 թ.–ի ծրագրերի իրականացման համար ՀՀ սփյուռքի նախարարությանը հատկացվող գումարը կկազմի 496 միլիոն դրամ: Զեկուցողը ներկայացրեց ընթացիկ տարում և 2012 թ.–ին յուրաքանչյուր ծրագրին հատկացված գումարի չափը:

2011 թ.–ին, ՀՀ սփյուռքի նախարարության պատվերով՝ «Նորավանք» գիտակրթական հիմնադրամի կողմից իրականացված գիտական հետազոտությունների կատարման վերաբերյալ զեկույցով հանդես եկավ հիմնադրամի տնօրեն Գ. Հարությունյանը: Նախարարության կողմից տրամադրված դրամաշնորհներով իրականացվել է «Արևելյան Եվրոպայի հայ համայնքների խնդիրները», «Ռուսաստանի Դաշնության հայության կրոնա-դավանանքային կողմնորոշումներ», «Սփյուռքի դավանանքային հատվածների խնդիրները և հնարավորությունները» թեմաներով հետազոտություններ:

ՀՀ սփյուռքի նախարարության աշխատակազմի համահայկական, միջազգային և եկեղեցական կառույցների հետ կապերի վարչության 2011 թ.–ի հաշվետվությունը ներկայացրեց վարչության պետ Կ. Սարգսյանը: Նա ներկայացրեց վարչության կողմից իրականացվող ծրագրերն ու միջոցառումները՝ անդրադառնալով դրանց արդյունքներին և շարունակվող ծրագրերի ընթացքին:

ՀՀ սփյուռքի նախարարության աշխատակազմի ղեկավար Ֆ. Զաքարյանը ներկայացրեց նախարարության 2012 թ.–ի գերակա խնդիրները և դրանց լուծմանն ուղղված քայլերը: Գերակա խնդիրներն են՝ նպաստել հայապահպանությանը, ազգահավաքի և հայրենադարձության խթանմանը, հայկական համայնքների ինքնակազմակերպման, միջհամայնքային և Հայաստան-Սփյուռք կապերի զարգացմանը, օժանդակել Սփյուռքում հայկական ներուժի բացահայտմանը և նրա ներգրավմանը Հայաստանի զարգացման գործընթացին: