Հայոց բազկի սարսափազդու ուժը

Ինչպես արդեն բոլորդ գիտեք, օրերս Նորվեգիայի Ֆորդե քաղաքում կայացած ծանրամարտի Եվրոպայի առաջնությունում Հայասատանի՝ թե՛ կանանց, թե՛ տղամարդկանց հավաքականները, գրանցելով փայլուն արդյունքներ, ևս մեկ անգամ ապացուցեցին աշխարհին, որ հայերս, հիրավի, արժանի ենք հարգանքի, իսկ մեր միասնական ոգին կոտրելը նույնքան անիրագործելի է, որքան, ասենք, գլխով ապարաժ քար ջարդելը: Տեղեկատվության կարգով նշենք, որ կանանց ու տղամարդկանց Հայաստանի թիմերը միասին նվաճեցին 18 մեդալ՝ 8 ոսկե, 7 արծաթ և 3 բրոնզե՝ մեդալային ընդհանուր հաշվարկով զբաղեցնելով առաջին տեղը ու իրենց հետևում թողնելով Թուրքիային, Ուկրաինային:

Համաձայնե՛ք, որ մանավանդ այս օրերին մեր երկրի՝ նման կարևոր մրցաշարում ունեցած այս անզուգական ձեռքբերումը շատ ավելին է, քան պարզապես հաղթանակը. այն կարծես թշնամու երեսին մեր կողմից շպրտած ապտակ է՝ փաստելու, որ հայերս անկոտրում ենք, լի ենք պայքարի անսպառ ավյունով ու ներշնչված մեր հերոս պապերի ոգով՝ պատրաստ ենք գնալու մինչև վերջ, տեր կանգնելու մեր ազգային արժանապատվությանն ու վերահաստատելու «հայ» անվան վեհությունը. Թուրքիայի նկատմամբ ունեցած 5 մեդալի առավելությունը, անշո՛ւշտ, ավելի քան խորհրդանշական կարելի է համարել:

Ձեռք բերված հաղթանակի մասով, ինչ խոսք, պետք է հատկապես ընդգծենք այն անհերքելի ճշմարտությունը, որ ցանկացած նմանատիպ հաղթանակ նախևառաջ թիմային աշխատանքի արդյունքում է հնարավոր լինում գրանցել: Սպորտային մրցաշարերում, ինչպես և պատերազմում, չափազանց կարևոր է ամուր թիկունք ունենալը, առանց որի նույնիսկ ամենատաղանդավոր մարզիկը, ինչպես և քաջ զինվորը, երբեք ու երբեք չի կարող հասնել այն բաղձալի արդյունքին, որը նրանից ակնկալում է մի ողջ ժողովուրդ:

Մասնավորապես՝ կարծում ենք՝ կհամաձայնեք, որ անուրանալի է մնում հատկապես ՀԱՕԿ-ի ունեցած դերն այս ամենում. Ծառուկյանը բոլորին վերջնականապես ապացուցեց, որ իրեն այլընտրանք պարզապես չկա ու դժվար էլ լինի. առանց ՀԱՕԿ ղեկավարի աչալուրջ հետևողականության, առանց նրա՝ հայ մարզիկների նկատմամբ ունեցած հոգածության, պարզապես անհնարին կդառնար Հայաստանի հաղթանակը, անիրագործելի կմնային մեր նպատակները: Ոչ ոք չի կարող հերքել այն փաստը, որ ծանրամարտում Հայաստանի՝ վերջին տարիներին ունեցած ձեռքբերումներն ուղիղ կերպով կապված են Գագիկ Ծառուկյանի անվան հետ: Հենց նրա կողմից իրագործվող խորը մտածված ու հեռատես ռազմավարության արդյունքում է, որ ունենում ենք մարզիկներ, որոնք կարողանում են ի ցույց դնել բոլորին մեր բազկի ուժն ու հզորությունը, բարձր պահել մեր երկրի պատիվը ողջ աշխարհում:

Վստահ ենք՝ ապագայում ևս մեզ սպասում են է՛լ ավելի փառահեղ հաղթանակներ, է՛լ ավելի մեծ ձեռքբերումներ, որոնց կարիքը, հատկապես այս լարված օրերին, բոլորս ունենք: Կեցցե՛ն մեր մարզիկները, կեցցե՜ն նաև նրանց նեցուկ եղողները… Ուռա՜:

Դավիթ Բաբանով