Բաղդասարյանի՝ ոչ երկիմաստ ակնարկը…

Համաձայնե՛ք' մեր իրականության մեջ կան քաղաքական դեմքեր, գործիչներ, որոնց ինքնավստահության, ունեցած հոգեկան խաղաղության վրա երբեմն միայն զարմանալ կարելի է: Իհարկե, հանուն արդարության պետք է ասել՝ չգիտես ինչ օրինաչափությունից ելնելով ու խիստ տարօրինակ զուգադիպությամբ նմանատիպ գործիչների բացարձակ մեծամասնությունը, որպես կանոն, իշխանական համակարգից են լինում, հանգամանք, որն անտեսել որևէ բանական մարդ պարզապես չի կարող: Ինչ խոսք, այդպիսի մարդկանց թվին է պատկանում և ԱԺ ՀՀԿ խմբակցության նախագահ բոլորիս հայտնի Վահրամ Բաղդասարյանը, ով, ի դեպ, հասցրել է օրերս հարցազրույց տալ՝ կապված Հրազդանի քաղաքապետի ընտրությունների հետ ու սեփական տեսակետները հնչեցնել տեղի ունեցածի վերաբերյալ: Երբ ընթերցում ես Բաղդասարյանի հարցազրույցը, այնպիսի տպավուրություն է ստեղծվում, թե Հրազդանի ընտրությունները մի քանի անգամ ավելի բարձր մակարդակով են անցել, քան կանցնեին, ասենք, Փարիզի քաղաքապետի ընտրությունները:

Մասնավորապես՝ արձագանքելով լրագրողի այն նկատառմանը, թե համատարած ընտրակաշառքների, այլ անձանց քվեարկության, այլ բնակավայրերից ավտոբուսներով մարդիկ բերելու մասին բազմաթիվ հրապարակումներ են եղել՝ Բաղդասարյանը, միայն բուդդիստին հատուկ հանգստությամբ, պատասխանել է. «Այդ ո՞ր պարտվողը ընտրակեղծիքների մասին հրապարակումներ չի անում կամ ասում է, թե չեմ պարտվել: Ինձ հասած տեղեկություններն էլ այնպիսին են, որ շատ նորմալ ընտրություններ են եղել: Իսկ եթե խախտումներ լինեն, անպայման կբացահայտվեն դրանք: Բայց բոլոր պարտվողներն էլ իրենց պարտության հետ չեն հարմարվում»:

Դե հիմա ասե՛ք՝ սրանից սպառիչ պատասխան դուք էլ ումի՞ց և ինչպե՞ս կարող էիք ստանալ, էլ ո՞վ կարող էր բացված թեման փակել այնպես, որ մարդու լեզուն պապանձվեր, ու էլ չհամարձակվեր շարունակել հարցեր տալ. դե իհարկե, բացառապես Բաղդասարյան Վահրամից: Հետաքրքիր է՝ որտեղի՞ց այս մարդուն այս աստիճան ինքնավստահություն, այս աստիճան ինքնահավան վերաբերմունք՝ սեփական անձի նկատմամբ… Իսկ ի՞նչ, եթե նման արդյունքների նա կարողացել է հասնել բացառապես ինքնաներշնչման արդյունքում կամ միգուցե նրա՞ն են ներշնչել, թե իշխանությունները միշտ անսխալական են, թե մեր երկրում անցկացված ու անցկացվելիք ընտրություններն այնքան իդեալական են, որ անգամ աղաղակող փաստերն ի զորու չեն Բաղդասարյանին հակառակում համոզել: Տեսնես ապագա Աժ ընտրություններն է՞լ են նման «բարձր մակարդակով» անցկացվելու, ինչպիսին էր Հրազդանինը, թե՞, այնուամենայնիվ, էլեկտրոնային քվերակությունն այնպիսի մի հրաշագործ համակարգ է, որը ի սկզբանե բացառում է թփերի տակ, մեքենաների «բարդաչոկներում» ու էլի նմանատիպ անհարմար ու գաղտնի վայրերում մարդկանց կաշառելու արատավոր պրակտիկան…

Ցավալի է, բայց փաստ, որ մենք այդպես էլ չենք կարողանում մեկընդմիշտ յուրացնել ազատ ու, ինչպես ընդունված է ասել, թափանցիկ ընտրություններ անցկացնելու մեխանիզմը, մեզ միշտ ինչ-որ մի բան ամենակուլմինացիոն պահին խանգարում է. չինովնիկների՝ ամեն գնով աթոռը պահելու վատառողջ տենչն է, որի դիմաց, վստահ ենք, ապագայում ևս անզոր են լինելու բոլոր տեսակի ընտրական համակարգերն ու բարձր տեխնոլոգիաները:

Դավիթ Բաբանով