«Գյումրեցու ոգի» կուսակցությունը հենց այնպես չի ստեղծվել

Այսօր մամուլում հրապարակվեց, որ Գյումրիի քաղաքապետ Սամվել Բալասանյանը նոր կուսակցություն է հիմնել: Այն կոչվում է «Գյումրեցու ոգի»: Երեկ՝ մայիսի 4-ին, անգամ տեղի է ունեցել հիմնադիր համագումարը: «Գյումրեցու ոգի» կուսակցության նախաձեռնող խմբի անդամ Սիրակ Եղիազարյանը, սակայն, հերքել է, թե իրենց կուսակցությունը որևէ կապ ունի Սամվել Բալասանյանի, Վարդան Ղուկասյանի կամ Մարտուն Գրիգորյանի հետ։

Գյումրեցի քաղաքագետ Գագիկ Համբարյանը կարծում է՝ կուսակցությունը հենց այնպես չի ստեղծվել։ «Ես ինքս շատ զարմացած եմ, որ այսպիսի կուսակցություն է ստեղծվել, որովհետև, լինելով գյումրեցի, ոչինչ չենք իմացել։ Երևի դա պայմանավորված էր ապրիլի սկզբին սահմանին տեղի ունեցած իրադարձություններով, կուսակցությունը զբաղվել է իր առաջին համագումարի կազմակերպչական աշխատանքներով։ Ես հետո մեկ շաբաթ քաղաքում եմ եղել, բայց դա որևէ կապ չունի»,- ԼՈՒՐԵՐ.com-ի հետ զրույցում ասաց մեր զրուցակիցը։

Քաղաքագետն, ընդհանուր առմամբ, նորմալ է վերաբերվում այս կուսակցության ստեղծմանը, քանի որ բոլորն էլ նախապատրաստվում են աշնանը սպասվող ՏԻՄ ընտրություններին, «չնայած այն հանգամանքին, որ ԸՕ-ն դեռ չի ընդունվել, և դեռ չգիտենք` Գյումրիում ինչ կարգով են ընտրությունները կատարվելու»։

«Ասում են՝ Երևանում, Գյումրիում և Վանաձորում նույն կարգով են ընտրություններն ընթանալու, այսինքն՝ ընտրելու են կուսակցությունների ցուցակներով առաջադրված թեկնածուներին, որոնց մեջին կուսակցությունն իր թեկնածուին կներկայացնի ավագանու նիստին, որի ժամանակ էլ կընտրվի քաղաքապետ»,- նշեց Համբարյանը։

Վերջինս դժվարացավ ասել՝ այս կուսակցությունն ինչ կապ կարող է ունենալ Վարդան Ղուկասյանի, Սամվել Բալասանյանի կամ գյումրեցի պատգամավոր Մարտուն Գրիգորյանի հետ. «Իմ կարծիքով՝ իրենք կընտրեն իրենց նախընտրելի թեկնածուի հետ համագործակցելու ուղին։ Չգիտեմ՝ ում հետ կհամագործակցեն, բայց այն, որ այս կուսակցությունը հենց այնպես չի ստեղծվել, հաստատ է։ Իրենք պետք է որոշեն՝ ում հետ համագործակցել, ինչ մեթոդներով և այլն»։

Ք. Ա.