Կաննում մեկնարկում է 69-րդ միջազգային կինոփառատոնը

Ֆրանսիայում մայիսի 11-ին մեկնարկում է Կաննի 69-րդ միջազգային կինոփառատոնը: Ինչպես տեղեկացնում է «Արմենպրես»-ը, փառատոնը կբացվի Վուդի Ալենի «Գեղեցիկ մարդիկ» նոր ֆիլմի ցուցադրմամբ: Կինոնկարը պատմում է մի երիտասարդի մասին, որը 30-ական թվականներին մեկնել է նվաճելու Հոլիվուդը: Ֆիլմում նկարահանվել են Ջեսսի Այզենբերգը, Քիրսթեն Սթյուարթը, Սթիվեն Կարելը եւ ուրիշներ: Սա Վուդի Ալենի արդեն երրորդ ֆիլմն է, որ բացում է Կաննի փառատոնը:

Հիմնական մրցույթում ընդգրկված է 20 ֆիլմ: Հեղինակավոր կինոստուգատեսում իրենց նոր աշխատանքները կներկայացնեն Ժան Պիեռ եւ Լյուկ Դարդենները («Անծանոթուհին»), Պեդրո Ալմադովարը («Ջուլիետա»), Կավիե Դոլանը («Սա ընդամենն աշխարհի վերջն է»), Օլիվիե Ասայասը («Անհատական գնորդը»), Բրյունո Դյումոնը («Մարմանդ գետում»), Ջիմ Ջարմուշը («Պատերսոն»), Նիկոլ Գարսիան («Քարե հիվանդություն»), Ալեն Գիրոդին («Շիտակ մնա»), Կլեբեր Մեդոնիչ Ֆիլխոն («Ջրհոս»), Կեն Լոուչը («Ես՝ Դենիել Բլեյքս»), Բրիյանտե Մենդոզան («Ma'Ros a»), Ջեֆ Նիկոլսը («Լավինգ»), Կրիստիան Մունջիուն («Ընտանեկան լուսանկարներ»), Մարկ Չհանը («Սպասուհին»), Շոն Փենը («Վերջին դեմքը») և ուրիշներ:

Այս տարի միջազգային ժյուրիի նախագահը կլինի ավստրալացի ռեժիսոր Ջորջ Միլլերը, որի «Խելահեղ Մաքսը: Ցաման ճանապարհ» կինոնկարն անցյալ տարի առաջին անգամ ներկայացվեց Կաննի կինոփառատոնի շրջանակներում:

Միլլերի հետ միասին մրցույթին ներկայացված ֆիլմերը դատելու են ֆրանսիացի ռեժիսոր և սցենարիստ Առնո Դեպլեշենը, ամերիկացի դերասան Դոնալդ Սազերլենդը, ամերիկացի դերասանուհի Քրիսթեն Դանսթը, իտալացի դերասանուհի և ռեժիսոր Վալերիա Գոլինոն, դանիացի դերասան Մադս Միկելսենը, ֆրանսիացի դերասանուհի Վանեսա Պարադին, հունգարացի ռեժիսոր, «Օսկարի» մրցանակակիր Լասլո Նեմեշը և իրանցի պրոդյուսեր Կատայն Շահաբին, հաղորդել է «Ինտերֆաքս»-ը: