FakeKiller. Հայ ծրագրավորողների ստեղծած հավելվածը կարգելափակի կեղծ տեղեկատվություն տարածող ադրբեջանական կայքերը

Գործարկվել է հայ ծրագրավորողների ստեղծած FakeKiller հավելվածը, որն արգելափակում է կեղծ տեղեկատվություն տարածող ադրբեջանական կայքերը:

ԼՈւՐԵՐ.com-ի տեղեկացմամբ` հավելվածը նպատակ ունի որոշ կայքերից օգտվելու դեպքում զգուշացնել մարդկանց, որ դա ադրբեջանական կամ ադրբեջանամետ կայք է, ինչն էլ մարդուն ընտրության հնարավորություն կտա, թե ինչպես ընդունի իր ստացած ինֆորմացիան:

«Չորսօրյա պատերազմի ընթացքում մի շարք ադրբեջանական և ադրբեջանամետ կայքեր ապատեղեկատվություն էին տարածում՝ օգտագործելով նաև Ղարաբաղին ընդհանրապես չվերաբերող հին տեսահոլովակներ: Այս կայքերը Հայաստանի տարածքում արգելափակելու դեպքում մարդիկ կմտածեին, թե իրենցից ինչ-որ բան է թաքցվում: Հետևաբար, որոշեցինք ստեղծել մի ծրագիր, որը մարդկանց կզգուշացնի վստահություն չներշնչող կայքերի մասին»,- ասաց Արթուր Ավանեսովը:

Արգելափակման ցուցակում այս պահին ներառված է 15 կայք: Ժամանակի ընթացքում ցանկը կհամալրվի:

Նշենք, որ FakeKiller հավելվածը ոչ միայն կարգելափակի մուտքը դեպի ադրբեջանական և ոչ վստահելի կայքեր, այլ նաև արդեն այդ կայքերի հղումները չեք տեսնի Ձեր ֆեյսբուքյան էջերին:

«Տեղեկացնեմ նաև, որ դուք սա դնելով՝ սահմանափակում եք ձեր տեղեկատվական հոսքերը, եւ ինքներդ պետք է գիտակցեք դա»,- ասաց Ավանեսովը։

Հավելվածը մշակել է ծրագրավորող Արթուր Ավանեսովը՝ Մեդիամաքսի գլխավոր խմբագիր Դավիթ Ալավերդյանի եւ տեղեկատվական անվտանգության փորձագետ Սամվել Մարտիրոսյանի աջակցությամբ:

Հավելվածը ներբեռնելու համար անցեք հետևյալ հղումով: