Հայաստանում երկիշխանությո՞ւն է. ՀՀ նախագահից բացի, կա նաև ՀՀ նախագահի պաշտոնակատար

Հայաստանում երկիշխանությո՞ւն է. ՀՀ նախագահից բացի, կա նաև ՀՀ նախագահի պաշտոնակատար. Չե՞ք հավատում… Իզուր:

Մենք հենց այնպես, անհիմն բան չենք գրի: Կա միանգամայն պաշտոնական փաստաթուղթ, որից տեղեկանում ենք, որ գոյություն ունի Ռոբերտ Սիմոնյան անուն ազգանվամբ ՀՀ նախագահի պաշտոնակատար, այն էլ' քրեական գործով տուժող: Խոսքը «Քաշաթաղ» հկ նախագահ Ռոբերտ Սիմոնյանի մասին է, իսկ պաշտոնական տվյալ փաստաթուղթը նրան 2015թ. նոյեմբերի 4-ին հասցեագրվել է ՀՀ Վերաքննիչ քրեական դատարանի աշխատակազմի կողմից, մասնավորապես' դատավորի օգնական Մ. Համբարձումյանի: Ինչպես ակնհայտ է, դրանում սևով սպիտակի վրա գրված է. «Տուժող' ՀՀ նախագահի պաշտոնակատար»:

Բնականաբար, հարցեր են առաջանում' Հայաստանում ովքե՞ր են դառնում դատավորի օգնական, որոնց աշխատավարձը, որքան տեղյակ ենք, բավական բարձր է: Հետաքրքիր է' ՀՀ նախագահ Սերժ Սարգսյանը տեղյակ է, որ եթե ինքը Հայաստանի Հանրապետության նախագահն է, իրենից բացի, կա նաև ՀՀ նախագահի պաշտոնակատար Ռոբերտ Սիմոնյան, եթե տեղյակ է, մտքով երբևէ անցե՞լ է նրան մի օր հրավիրել իր մոտ, սուրճի կամ թեյի սեղանի շուրջ մտերմիկ զրույց ունենալ, խելք խելքի տալ, քննարկել երկրի հալը, երկիրն այս ծանր վիճակից հանելու ուղիներ փնտրել, վերջը Ղարաբաղի հարց կա, ձեռքից գրեթե գնացած տնտեսության հարց կա, ներքաղաքական և արտաքին քաղաքական հազարումի հարցեր կան…

 Արթուր Հովհաննիսյան