Ընտանիքի մասին Ամենայն Հայոց Կաթողիկոսի և Հռոմի Պապի ընկալումը բացառում է նույնասեռականների միությունն ընտանիք համարելը

Մայր Աթոռ Սուրբ Էջմիածնի Վեհարանի գահասրահում այսօր' հունիսի 26-ին, տեղի է ունեցել Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսի և Հռոմի Սրբազան Քահանայապետ Ֆրանցիսկոս Պապի համատեղ հռչակագրի ստորագրման արարողությունը:

Համատեղ հռչակագրում անդրադարձ կա նաև գենդերի խնդրին.

«Հասարակության ստվար հատվածների աշխարհիկացումը, օտարումը հոգևորից ու աստվածայինից, անխուսափելիորեն հանգեցնում են մարդու և մարդկային ընտանիքի ապասրբացմանն ու նյութապաշտական ընկալմանը: Այս առումով մենք մտահոգ ենք շատ երկրներում ընտանեկան կյանքի ճգնաժամով: Հայ և Կաթոլիկ եկեղեցիներն ընտանիքի մասին նույն ընկալումն ունեն, որը հիմնված է ազատ կամքով ու հավատարմությամբ ծնված սիրո արդյունք հանդիսացող տղամարդու և կնոջ ամուսնության վրա»:

Այսպիսով, երկու եկեղեցիների առաջնորդները վերահաստատել են ընտանիքի վերաբերյալ իրենց ընկալումը, որը հիմնված է ազատ կամքով ու հավատարմությամբ ծնված սիրո արդյունք հանդիսացող տղամարդու և կնոջ ամուսնության վրա:

Ընդգծեմ` տղամարդու և կնոջ ամուսնության վրա, այսինքն` ըստ հոգևոր առաջնորդների, տղամարդու և տղամարդու ամուսնությամբ միությունը, կնոջ և կնոջ ամուսնությամբ միությունն ընտանիք չեն, ընտանիք չեն կարող կոչվել: Սա' ի գիտություն ՀՀ այն բոլոր հասարակական կազմակերպությունների ներկայացուցիչներին և Արևմուտքի ճնշման ներքո գտնվող պետական պաշտոնյաներին, որոնք գենդերային օրենսդրության, ներառյալ «Խտրականության դեմ» ՀՀ օրենքի նախագծի պաշտպանը, ջատագովը և առաջ մղողներն են:

Արթուր Հովհաննիսյան