ՀՀ սփյուռքի նախարարն ընդունեց Անտուան Բաղդիկյանի գլխավորած պատվիրակությանը

ՀՀ սփյուռքի նախարար Հրանուշ Հակոբյանն ընդունեց Ֆրանսիայում Հայ նախկին ռազմիկների ու դիմադրականների միության նախագահ Անտուան Բաղդիկյանի գլխավորած պատվիրակությանը: Միությունը մաս է կազմում Ֆրանսիայի հայկական կազմակերպությունները համակարգող CCAF խորհրդի և ակտիվ գործունեություն ծավալում ի հիշատակ 2-րդ համաշխարհային պատերազմի հերոս Միսաք Մանուշյանի և նրա խմբի 23 անդամների:

Նախարար Հ.Հակոբյանը ողջունեց ներկաներին' կարևորելով ֆրանսահայ համայնքի դերը Հայաստան-Ֆրանսիա պետական հարաբերությունները բարձր մակարդակի վրա պահելու գործում: Նա շնորհակալություն հայտնեց ֆրանսահայ համայնքին' հայ ժողովրդի համար նշանակալի իրադարձությունները մշտապես նշելու, լուսաբանելու, անհրաժեշտ թեմաներով ցուցահանդեսներ կազմակերպելու և ակտիվ գործունեության համար:

Համայնք, որը «փայլուն պայքարում է հային հայ պահելու համար, հետևողական է Հայ Դատի հարցում, սիրում է իր Հայրենիքը և պատրաստ է անմիջապես արձագանքել և օգնել սփյուռքի նախարարության բոլոր ծրագրերին»,- նշեց նախարարը: Հ. Հակոբյանն առանձնակի շեշտեց Ֆրանսիայում Հայ նախկին ռազմիկների ու դիմադրականների միության նախագահ Անտուան Բաղդիկյանի ազգանվեր գործունեությունը' մասնավորեցնելով վերջինիս ջանքերով Հայոց ցեղասպանության հիշատակը հավերժացնող հուշախաչքարի տեղադրումը:

Այնուհետև ներկաներին ողջունեց և շնորհակալություն հայտնեց Ֆրանսիայում Հայ նախկին ռազմիկների ու դիմադրականների միության նախագահ Անտուան Բաղդիկյանը: Նա ներկայացրեց հայ կամավորների մասնակցությունն Առաջին և Երկրորդ համաշխարհային պատերազմներին' չմոռանալով հիշատակել նաև այն, որ նապոլեոնյան բանակում նույնպես ավելի քան 20 հայ բարձրաստիճան զինվորական է եղել:

Հուզիչ և ուշագրավ էր սկավառակների նվիրաբերումը Հայաստանին և Ցեղասպանության թանգարանին: Դրանք 30 երկար ու ձիգ տարիների աշխատանքի պտուղ են և ամփոփում են Ցեղասպանությունը վերապրածների ցավի, սարսափի ու չմարող մրմուռի 100 ժամ:

Նախարար Հրանուշ Հակոբյանը պատվիրակությանը նվիրեց ՀՀ սփյուռքի նախարարության հրապարակած «Ցավի, հիշողության և պայքարի կոթողներ» և «Անի 1050» գրքերը: