Բնապահպանության նախարարության պարզաբանումը Լուրեր.com-ի «Պարոն նախարար, ովքե՞ր են ձեր տեսուչները…» հրապարակման առնչությամբ

ՀՀ բնապահպանության նախարարության տեղեկատվության և հասարակայնության հետ կապերի վարչությունն այսօր մամուլի հաղորդագրությամբ արձագանքել է Լուրեր.com-ում երեկ հրապարակված «Պարոն նախարար, ովքե՞ր են ձեր տեսուչները…» վերտառությամբ հրապարակմանը: Ստորև նույնությամբ ներկայացնում ենք հիշյալ վարչության պարզաբանումը.

«Lurer.com կայքում օգոստոսի 29-ին հրապարակված «Պարոն նախարար, ովքե՞ր են ձեր տեսուչները…» վերնագրով լուրում տեղ գտած մեկնաբանության առնչությամբ ՀՀ բնապահպանության նախարարությունը հայտնում է, որ վերոհիշյալ քրեական գործը հարուցվել է նախարար Արամայիս Գրիգորյանի' այդ պաշտոնում նշանակվելուց հետո և նախարարության ենթակայության տակ գտնվող բնության հատուկ պահպանվող տարածքներում հսկողությունն ուժեղացնելու ուղղությամբ նրա կարգադրությամբ իրականացված միջոցառումների արդյունքում: Միջոցառումների շրջանակում կատարված ստուգումների արդյունքում ՀՀ բնապահպանության նախարարության «Դիլիջան» ազգային պարկի պատասխանատուները բացահայտել են խախտումները և Բնապահպանական պետական տեսչության միջոցով գործերը հանձնել իրավապահ մարմիններին, ինչի հիման վրա էլ հարուցվել է քրեական գործ: Հայտնում ենք նաև, որ Մարինե Պետրոսյանը որպես տեսուչ սկսել էր աշխատել 07.03.13 թվականից, այսինքն' մինչև Արամայիս Գրիգորյանի կողմից ՀՀ բնապահպանության նախարարի պաշտոնը ստանձնելը: Մարինե Պետրոսյանն աշխատանքից ազատվել է 27.03.15 թվականին' իր պահպանության տակ գտնվող պահաբաժնից 162 ծառի ապօրինի հատման փաստի բացահայտման հիմքով»:

Ամեն ինչ հասկանալի է, պարզապես մի փոքր պարզաբանման կարիք էլ մեր կողմից կա. տվյալ հրապարակման սկզբում առկա մեր «ովքե՞ր են ձեր տեսուչները…» հարցում «ձեր»-ը վերաբերում է ոչ ՀՀ բնապահպանության նախարար Արամայիս Գրիգորյանին, այլ ՀՀ բնապահպանության նախարարությանը, հետևաբար այդ առումով որևէ նշանակություն չունի, որ Մարինե Պետրոսյանը որպես տեսուչ սկսել էր աշխատել 07.03.13 թվականից, այսինքն` Արամայիս Գրիգորյանի կողմից կամ նրա պաշտոնավարության ժամանակ չի նշանակվել:

Երկրորդ. մեր հրապարակման մեջ չկա որևէ պնդում, թե Մարինե Պետրոսյանին հենց պարոն Գրիգորյանն է նշանակել «Դիլիջան Ազգային պարկ» ՊՈԱԿ-ի «Հաղարծին» տեղամասի 7-րդ պահաբաժնի տեսուչ, քանի որ «այս ո՞ւմ եք տեսուչ նշանակել» հարցն ունի նաև շարունակություն` «կամ ո՞ւմ են տեսուչ նշանակել ձեզ մոտ», ինչը ընթերցողին հասկանալի է դարձնում, որ Մարինե Պետրոսյանը ՀՀ բնապահպանության նախարարությունում (ձեզ մոտ) կարող էր տեսուչ նշանակված լինել ավելի վաղ, նախորդ նախարարի կամ մեկ ուրիշի հրամանով:

Վերջում մեկ առաջարկ կամ խորհուրդ հիշյալ վարչության աշխատակիցներին. արձագանքեք բնապահպանության նախարարության ու բնապահպանության վերաբերյալ Լուրեր.com-ի բոլոր հրապարակումներին, ոչ թե ընտրողաբար…