Եվրոպացու, եվրոպական կառույցի մտքով չէր անցել, թե այդ ամենի արդյունքում բնությունն ինչ ստացավ, բնակչությունն ինչ ստացավ

«Եվրոմիությունը տարբեր երկրներում, նաև Հայաստանում ծրագրեր է իրականացնում կանաչ էկոնոմիկայի զարգացման ուղղությամբ: Այս կապակցությամբ Լուրեր.com-ի հետ զրույցում էկոլոգ, Հանուն կայուն մարդկային զարգացման ասոցիացիայի» նախագահ, աշխարհագրական գիտությունների դոկտոր Կարինե Դանիելյանն ասաց.

«Այստեղ ևս բավական մեծ գումարներ են ծախսել, հետո պետք է վերահսկվեին արդյունքները, ու մեզ էլ էին ներգրավել: Հարցաշարը եկել էր այսպես' ինչ է արվել… Մենք այդ հարցաշարով գնացինք, և ստացված պատասխաններով Հայաստանը գրավեց առաջին տեղը. ամեն ինչ արվել էր, ինչ որ պետք է արվեր: ՀԿ-ների հետ քննարկեցինք այդ արդյունքները, հասարակական կազմակերպությունների ղեկավարները, ներկայացուցիչներն ապշել էին, հարցնում էին՝ դուք գժվե՞լ եք, այս ի՞նչ եք գրել: Ասացի՝ բայց ի՞նչ անեինք, հարցաշարն այսպիսին է՝ դուք ընդունել եք համապատասխան օրենքը, պատասխանել ենք' ընդունել ենք, ծրագիր մշակե՞լ եք, մշակել ենք, համապատասխան կառույց ստեղծե՞լ եք, ստեղծել ենք… Դե, ուրեմն, ամեն ինչ լավ է, ամեն ինչ կաշխատի: Հասկանո՞ւմ եք… Իսկ թե այդ ամենի արդյունքում բնությունն ի՞նչ ստացավ, բնակչությունն ի՞նչ ստացավ, այդ հարցերը տալը եվրոպացու, եվրոպական կառույցի մտքով չէր անցել:

Նրանց մտքով չի անցնում, որ չնայած այդ ամենին, բնությունն ու բնակչությունը կարող են ոչինչ չստանալ: Եվ մենք Բրյուսելում մեր կազմակերպության անունից ասացինք, որ ձեր հարցաշարերը լիարժեք չեն, վերջում այն հարցը պետք է լինի, թե գործնականում ի՞նչ արդյունք ունենք, արդյունքի վերաբերյալ պետք է հարցեր լինեն: Դրանից հետո Եվրոմիության արևելյան գործընկերության ծրագրի շրջանակներում շրջակա միջավայրի և կայուն զարգացման մասով Հայաստանի իրականացրած քայլերի վերաբերյալ այդ թվանշանները, իհարկե, փոխվեցին. Հայաստանը 1-ին տեղից իջավ 3-րդ թե 4-րդ տեղը:

Անդրադառնամ նույն փոքր ՀԷԿ-երին. շատ դրական ու միջազգային ասպարեզում ընդունված բան են, սակայն գիտեք, թե Հայաստանում այդ պլյուսն ինչպես է մինուսի վերածվել: Վիրտուալ տարածքում ամեն ինչ ընտիր ստացվում է, իրական տարածքում կարող է լրիվ հակառակը լինել»: