Ռուսական ձվերը, «Հավիցա» մակնշումը և Սննդամթերքի անվտանգության պետական ծառայության խայտառակ գործելակերպը

Անցյալ ամիս հայաստանյան շուկայում են հայտնվել Ռուսաստանից մեր երկիր ներկրված, ռուսաստանյան «Նովոռոսիյսկ» թռչնաֆաբրիկայի արտադրության, սակայն, ըստ ԶԼՄ-ների հրապարակումների, հայկական ընկերությունների մակնշմամբ և իբրև հայկական իրացվող հավկիթներ:

Իհարկե, ռուսական արտադրության հավկիթների հայտնվելը մեր շուկայում օրենքի խախտում և անթույլատրելի չէ, ներքին շուկայում դրա անհրաժեշտությունը եղել է, որ ինչ-որ անձ կամ անձինք բերել են այն: Անթույլատրելին այլ բան է՝ սպառողներին խաբելը և դրանք հայկական արտադրանքի անվան տակ վաճառելը:

Բացի վերոնշյալից, խիստ կասկածի տեղիք է տալիս ժամկետների հարցը: Ըստ «Առավոտ»-ի հրապարակման, որոշ դեպքերում «Հավիցա» (Բաղրամյանի թռչնաֆաբրիկա) և ԳԹՖ (Գնդեվազի թռչնաֆաբրիկա) ապրանքանիշների դրոշմակնիքներով իրացվող ռուսական ձվերի արկղերի վրա առկա արտադրողի մակնշումից երևում է, որ արտադրանքը թողարկվել է օգոստոսի 12-ին, մինչդեռ Երևանի խանութներում այն իրացվում է տարբեր արտադրման օրերով՝ օգոստոսի 18-26-ը: Ընդ որում, «Հավիցա» ապրանքանիշով հայտնի «Բաղրամյանի թռչնաֆաբրիկա» ընկերության թռչնանոցը, ըստ ԶԼՄ-ների հրապարակումների, բավական ժամանակ է արդեն, դադարեցրել է իր գործունեությունը (ոչ պաշտոնական տեղեկատվության համաձայն, Բաղրամյանի թռչնաբուծականում ածան հավեր չկան), հետևաբար պարզ է, որ տվյալ ապրանքանիշով իրացված, գուցե հիմա էլ իրացվող հավկիթները նշված ընկերությանը, այսինքն' տեղական արտադրանք չեն:

Վերոնշյալի կապակցությամբ քաղաքացիներից ու տարբեր լրատվամիջոցներից բազմաթիվ ահազանգեր է ստացել նաև Հայաստանի թռչնաբույծների միության նախագահ Սերգեյ Ստեփանյանը: Այս մասին տեղյակ է նաև ՀՀ ԳՆ սննդամթերքի անվտանգության պետական ծառայությունը, որը, սակայն, դարձյալ դրսևորել է անգործություն կամ նույնքան խայտառակ դանդաղկոտություն, և այդպիսով հերթական անգամ փաստել, որ ծառայության պետ Արմեն Հայրապետյանի պաշտոնանկությունն օրախնդիր անհրաժեշտություն է:

Որևէ նորմալ պետության մեջ (իսկ մեր պետությունն աննորմալ է, որովհետև Արմեն Հայրապետյանը դեռ իր պաշտոնին է) որևէ նման ծառայություն, որին պետականորեն վստահված է սննդամթերքի անվտանգության ապահովման, դրա նկատմամբ վերահսկողություն իրականացնելու խիստ կարևոր ու պատասխանատու գործը, ԶԼՄ-ների նման հրապարակումների դեպքում անմիջապես արձագանքելով դրանց, կդիմեր այդպիսի տեղեկություն հրապարակած լրատվամիջոցին, նրանից կխնդրեր համապատասխան փաստեր, նյութեր, տեղեկություններ, որոնք կհաստատեին կամ որոնց միջոցով հնարավոր կլիներ ապացուցել վերոնշյալը, իսկ ապացուցելուց, օրենքի խախտում հայտնաբերելուց հետո կձեռնարկեր օրենսդրությամբ նախատեսված համապատասխան միջոցներ՝ մեղավորներին վարչական պատասխանատվության ենթարկելու ուղղությամբ: Սակայն, քանի որ Սննդամթերքի անվտանգության պետական ծառայության պետը, ինչպես մեկ այլ առիթով ու հրապարակման մեջ արդեն նշել եմ, կամ վախենում է կատարել իր պարտականությունները, կամ դրանք չի կատարում կոռուպցիոն ինչ-որ պատճառով, հիշյալ ծառայությունն ընտրել է այլ գործելակերպ: Ծառայության պետի մամուլի քարտուղարը ռուսական արտադրանքը հայկականի անվան տակ իրացնելու կապակցությամբ «Առավոտ»-ին ասել է.

«Նման փաստ, նման դեպք, որ մեկ երկրի արտադրության ապրանքն այլ մակնշմամբ վաճառվում է՝ չենք հանդիպել: Եթե կան հիմնավոր փաստեր, բացահայտում և ահազանգեր կոնկրետ դեպքերով, պատրաստ ենք դրա ետևից գնալ» (հոդվածն՝ այստեղ):

Դրանից հետո «Առավոտ»-ի 27.08.2016թ. համապատասխան հրապարակումը հենց այդպիսի ահազանգ էր, հոդվածի հետ հրապարակվել էին նաև «Երևանի մի շարք խանութներում, այդ թվում նաև խոշոր սուպերմարկետներում խնդրո առարկա հավկիթների իրացումը վկայող լուսանկարներ, այդ թվում՝ վաղուց գործունեությունը դադարեցրած «Հավիցա» մակնշմամբ լուսանկարներ»: Իսկ ի՞նչ է արել Սննդամթերքի անվտանգության պետական ծառայությունը դրանից հետո: Անցած 10 օրում նրա լռությունը լավագույն պատասխանն է այս հարցի: Ծառայությունն իր պաշտոնական կայքում արդեն պետք է հրապարակած լիներ այս կապակցությամբ իր դիտարկման կամ, ավելի ճիշտ, ստուգման արդյունքները, մինչդեռ հիշյալ կայքում այս կապակցությամբ տվյալ պահի դրությամբ դեռ ոչինչ չկա հրապարակված:

Արթուր Հովհաննիսյան