Այսօր լիբանանյան «Ազդակ» թերթի 85-ամյակն է

Այսօր Լիբանանում հրատարակվող «Ազդակ» թերթի 85-ամյակն է: Վերջին շրջանում այն լույս է տեսնում նաև արաբական տարբերակով՝ արաբ ընթերցողների համար: Այս մասին լրագրողների հետ հանդիպմանն ասաց ՀՅԴ Հայ Դատի և քաղաքական հարցերի գրասենյակի պատասխանատու Կիրո Մանոյանը:

Նա նշեց, որ «Ազդակ»-ը հիմնադրվել է 1927-ի մարտի 5-ին, որպես մասնավոր թերթ, սակայն միշտ եղել է Դաշնակցության տրամադրության տակ: Սկսել է հրապարակվել Հայկ Բալյանի կողմից: Թերթը սկզբում եղել է եռօրյա պարբերական, ավելի ուշ դարձել է երկօրյա: 1965-ին ամբողջությամբ փոխանցվել է Դաշնակցության Լիբանանի պետական կոմիտեին և լույս է տեսնում որպես Լիբանանի կենտրոնական կոմիտեի պաշտոնաթերթ: 1970-ականների վերջերին, թերթը, հակառակ Լիբանանում քաղաքացիական պատերազմին, ավելի ծավալվել է, ունեցել է 8 էջ, իսկ հիմա արդեն ունի տաս էջ: Քաղաքացիական պատերազմում, երբ որ Բեյթութը բաժանված էր, թերթը լույս է տեսել Բեյրույթի մի մասում՝ արևմտյան, բայց տարածվում էր հիմնականում արևելյան շրջաններում: 1994-ից տպարանն ունեցել է իր նոր սարքվորումները, և 2002-ից թերթն ունի կայքէջ: 

Ասուլիսի մյուս բանախոս՝ թերթի մշակութային բաժնի խմբագրիչ Մովսես Հերկելյանն էլ ասաց, որ շաբաթը երկու անգամ լույս է տեսնում մշակույթի էջ:

««Ազդակ»-ը միշտ ներկայացրել է Լիբանանի հայ համայնքի մշակութային կյանքը, անդրադարձել է համաշխարհային կարևորության մշակութային իրադարձություններին»,- ասաց նա և հավելեց, որ խորհրդային տարիներին «Ազդակ»-ը հասնում էր նաև Հայաստան:

«Ազդակ»-ի երևանյան աշխատակից Թաթուլ Հակոբյանն էլ նշեց, որ թերթը տպագրվում է 3000 օրինակով մի գաղութում, որն ունի 50 հազար բնակիչ: