Բոստոնում բացվել է հայկական ժառանգության զբոսայգի
Սփյուռք
Բոստոնի հայերի և հարևան բնակավայրերի հայ համայնքի ներկայացուցիչների, Մասաչուսեթսի նահանգային իշխանության ներկայացուցիչների և Հայաստանի պետական այրերի մասնակցությամբ բացվել է Ռոուզ Ֆիցջերալդ Քենեդու անվան կանաչ գոտու շարունակության՝ Հայկական ժառանգության զբոսայգին, հաղորդում է «Ասպարէզ»-ը։
Զբոսայգին ունի ջրավազան, ներգաղթյալների պատվին կանգնեցված հուշարձան, ինչպես նաև քարերից ու խոտից կազմված լաբիրինթոս։
Հայկական ժառանգության զբոսայգին հայ համայնքի նվերն է Մասաչուսեթսի քաղաքացիներին և Բոստոն քաղաքին։
Հայկական ժառանգության զբոսայգու բացման օգտին իրենց մեծ ներդրումն են ունեցել Մասաչուսեթսի նահանգապետ Դուալ Պատրիկը, քաղաքապետ Թոմաս Մ. Մենինոն, կոնգրեսական Էդուարդ Ջ. Մարկեյը և Միդլսեքս շրջանի ոստիկանապետ Փիթեր Ջի Քութուջյանը։ Միջոցառմանը Հայաստանից ներկա են եղել արտգործնախարար Էդվարդ Նալբանդյանը, Սփյուռքի նախարար՝ Հրանուշ Հակոբյանը, ԱՄՆ-ում Հայաստանի դեսպան՝ Թաթուլ Մարգարյանը։ Այգու օրհնությունը կատարել է Խաժակ արքեպիսկոպոս Պարսամյանը, արքեպիսկոպոս Օշական Չոլոյանի և արքեպիսկոպոս Վիգեն Հայկազյանի հետ միասին։
Ողջույնի խոսքով ելույթ է ունեցել Մասաչուսեթսի նահանգապետը։
Նշենք, որ Հայկական ժառանգության հիմնադրամը ստեղծվել է 2005-ին։
ՈՒՂԻՂ ԵԹԵՐ
Ամենադիտված 
Իմ դարի չափ տխրությունն Անին վերցրեց իր փխրուն ուսերին ու տարավ․ Նազենի Հովհաննիսյան
