Հայ նախարարները մասնակցել են «Հայկական ժառանգության» այգու և Հայոց Ցեղասպանության զոհերի հիշատակի հուշարձանի բացմանը

Մայիսի 22-ին ՀՀ սփյուռքի նախարար Հրանուշ Հակոբյանը, Հայաստանի արտաքին գործերի նախարար Էդվարդ Նալբանդյանը, Մասաչուսեթսի նահանգապետ Դեվալ Պատրիկը, կոնգրեսմեն Էդ Մերկին, Բոստոնի քաղաքապետ Թոմաս Մենինոն, Հայկական ժառանգության հիմնադրամի նախագահ Ջեյմս Գալուստյանը, ԱՄՆ-ում ՀՀ դեսպան Թաթուլ Մարգարյանը, ԱՄՆ արևելյան ափի հոգևոր առաջնորդները և այլ պաշտոնատար անձինք ներկա էին Բոստոնի սրտում գտնվող «Հայկական ժառանգության» այգու և Հայոց Ցեղասպանության զոհերի հիշատակը հավերժացնող հուշակոթողի պաշտոնական բացման արարողությանը:

«Հայկական ժառանգության» զբոսայգին Մասաչուսեթսի ամերիկահայ համայնքի նվերն է նահանգի քաղաքացիներին և Բոսթոն քաղաքին:

Զբոսայգու բացման օգտին էին արտահայտվել Մասաչուսեթսի նահանգապետ Դևալ Պատրիկը, Բոսթոնի քաղաքապետ Թոմաս Մ. Մենինոն, կոնգրեսական Էդուարդ Ջեյ Մարքին և Միդլսեքսի շրջանի շերիֆ Փիթեր Ջեյ Քութուջյանը:

«Բոստոնը եղել և շարունակում է մնալ փայլուն օրինակ այն բանի, թե ինչպես կարող են մշակութապես տարբեր համայնքները հասնել հաջողության,-իր ելույթում նշել է Բոսթոնի քաղաքապետ Թոմաս Սենինոն և ավելացրել,-Ես զգացված եմ հայ համայնքի կողմից մեր քաղաքին արված այս հրաշալի նվերի համար, որը միշտ ծառայելու է որպես ամերիկահայ համայնքի նվաճումների առհավատչյա»:

«Հայկական ժառանգության» այգին այսուհետ խորհրդանշելու է այն հայ ներգաղթյալներին, ովքեր հաղթահարելով բազում դժվարություններ, իրենց մեծ նպաստն ունեցան ամերիկյան մշակույթում և հասարակական կյանքում»,-նշել է հիմնադրամի նախագահ Ջեյմս Գալուստյանը:

Նորաբաց այգին օրհնել են ամերիկահայ հոգևորականները:

Լուսանկարը` Տիգրան Բալայանի։