Արամայիս Գրիգորյանը կազատվի՞ Հովիկ Աբրահամյանի կադրերից

Ինչպես արդեն տեղեկացրել ենք, Արարատի մարզն այսուհետ նոր մարզպետ ունի.  Արամայիս Գրիգորյանը ստանձնեց Արարատի մարզպետի պաշտոնը:

Կառավարության նիստի ավարտից հետո լրագրողների հետ  զրույցում Արամայիս Գրիգորյանը նշեց, որ  պաշտոնը ստանձնելու առաջարկություն ստացել ՀՀ նախագահից և վարչապետից, և իր համար անակնկալ չէր այդ նշանակումը:

Հարցին՝ արդյո՞ք իր նշանակումը միտում ունի մարզում թուլացնել նախկին վարչապետի ազդեցությունը, Արամայիս Գրիգորյանը պատասխանեց. «Դա իմ հարցը չէ»:

Իսկ դիտարկմանը, թե նորանշանակ մարզպետը կազատվի՞ նախկին վարչապետ Հովիկ Աբրահամյանի կադրերից, Արամայիս Գրիգորյանը պատասխանեց. «Բոլոր այն մարդիկ, ովքեր աշխատել են պրոֆեսիոնալ ձևով, պետք է մնան իրենց պաշտոններում»:

Լրագրողի հարցին՝ պաշտոնյայի առաջ ՀՀԿ-ի կողմից դրվել է նախապայման՝ ընտրությունների ընթացքում ձայներ հավաքագրելու առումով, վերջինս պատասխանեց. «Այս մասին դեռ վաղ է խոսելը: Ես ժողովրդին ծառա եմ գնում: Նախկինում աշխատել եմ այդ տարածքում, ժողովուրդն ինձ շատ լավ է ճանաչում, ես էլ ժողովրդին եմ շատ լավ ճանաչում: Այնպես չէ, որ այստեղ քաղաքականություն է: Ես գնում եմ ծառայելու, որպեսզի կարողանանք մի բան ավել անել մեր ժողովրդի համար»:

Վերջում Արամայիս Գրիգորյանը խոստացավ շատ շուտով հանդիպել լրագրողների հետ իր կողմից իրականացված աշխատանքներն ամփոփելու համար: 

Հիշեցնենք, որ նախկինում Արամայիս Գրիգորյանը ղեկավարել է Արարատի մարզը և զբաղեցրել է բնապահպանության նախարարի պաշտոնը:

Աղավնի Սուքիասյան