Ստյոպա Սաֆարյանն՝ իր՝ «Ազատ դեմոկրատներ»-ին միանալու մասին

Երեկ, կեսօրից հետո համացանցում հայտնվեց առաջիկա խորհրդարանական ընտրություններին ներկայացվելիք՝ «Ազատ դեմոկրատներ» կուսակցության համամասնական ցուցակը, որը, սակայն, անհետացավ:

Ըստ այդ ցուցակի՝ կուսակցության առաջին հնգյակում են Հրանտ Բագրատյանը, Խաչատուր Քոքոբելյանը, Ստյոպա Սաֆարյանը, Անահիտ Բախշյանը և Մասիս Այվազյանը:

ԼՈւՐԵՐ.com-ի թղթակցի հետ զրույցում Միջազգային և անվտանգության հարցերի հայկական ինստիտուտի (ՄԱՀՀԻ) հիմնադիր և հետազոտական ծրագրերի ղեկավար Ստյոպա Սաֆարյանն ասաց, որ արդեն կես ամսից ավել է՝ բանակցություններ են գնում: Ըստ մեր զրուցակցի՝ այս պահի դրությամբ շատ հարցեր համաձայնեցված են, սակայն դեռևս վերջնական հայտարարություն չի արվի, քանի դեռ ամբողջ թիմը պատրաստ չէ, բոլորի հետ պայմանավորվածություն ձեռք բերված չէ:

«Ցուցակի հետ կապված՝ կարող եմ ասել, որ կուսակցության վարչությունը պետք է իր որոշմամբ հաստատի այն: Ցուցակն այդպիսին է, սակայն դեռևս վերջնական հայտարարություն չենք կարող անել: Իմ մասով՝ կարող եմ ասել, որ որքան էլ ունեցել եմ այլ առաջարկներ, այս պահին գերազանցապես դիտարկում եմ «Ազատ Դեմոկրատներ»-ի առաջարկը»,- ասաց Սաֆարյանը:

Արդյոք կուսակցությունն այս պահին ունի՞ հնարավորություն՝ առանց որևէ դաշինքի՝ հաղթահարելու խորհրդարան մտնելու համար անհրաժեշտ ձայների շեմը, պարոն Սաֆարյանը պատասխանեց.

-Հավատացեք՝ ի նկատի ունենալով քաղաքական ուժերի նկատմամբ տոտալ անվստահությունը, մարդկանց օտարվածությունը քաղաքական կյանքից, շեմը հաղթահարելու խնդիր, գրեթե անխտիր, ունեն բոլորը՝ կլինի դաշինք, թե կուսակցություն: «Ազատ դեմոկրատներ»-ի շանսերը բացարձակապես ավելի պակաս չեն, քան մյուս կուսակցություններինը, որոնք ներքաղաքական կյանքում ավելի լուրջ դերակատարում են ունեցել անցյալում: Ես չեմ կարծում, թե այդ նույն ռիսկերը առկա չեն ՀՅԴ-ի, ՀԱԿ-ի, «Հայկական վերածնունդ»-ի, ԵԼՔ-ի, Սեյրան Օհանյան և Վարդան Օսկանյան դաշինքի համար: Ես չգիտեմ՝ դաշինքներն ինչպիսի ինքնավստահություն ունեն, դա իմ խնդիրը չէ, բայց ակնհայտ է, որ ընտրողի հավատը վերականգնելու դժվարություն ունեն համատարած բոլորը: Շանսը թերևս մեկն է. առաջ քաշել գրավիչ, հրապուրիչ պլատֆորմ, որն իսկապես մարդկանց հավատ կներշնչի, որ պետության կյանքում բան կփոխվի այդ ծրագրի իրականացման արդյունքում, և նաև ներկայանալի թիմ, որը մարդկանց մոտ այլ զգացողություններ չի առաջացնի:

Թե ովքե՞ր են ընդգրկված թիմում, պարոն Սաֆարյանն այս պահին խուսափեց պատասխանել, սակայն նշեց, որ բավական հետաքրքիր անուններ են՝ անհատապես հայտնի, բայց գուցե շատերի համար՝ անակնկալ, որ նրանք կլինեն քաղաքականության մեջ:

- Ինչ-որ չափով այս թիմը մասամբ հիշեցնելու է 2007 թվականի «Ժառանգության» թիմը, որը հավաքված էր հանրային լավ դեմքերից՝ ամեն մեկն իր ինքնուրույն կենսագրությամբ և հետագծով: