Համանախագահներն իրենց անհասցեական հայտարարություններով խրախուսում են Ադրբեջանի ձեռագիրը

Մինսկի խմբի նման հավասարակշված հայտարարությունները խրախուսում են Ադրբեջանին՝ շարունակել իր ապակառուցողական քաղաքականությունը: Այս մասին այսօր լրագրողների հետ հանդիպման ժամանակ հայտարարեց Ազգային ժողովի ՀՀԿ խմբակցության պատգամավոր, քաղաքագետ Կարեն Բեքարյանը: «Այս հայտարարությունների անհասցեականությունն Ադրբեջանն ընդունում է որպես նման ձեռագրի անուղղակի խրախուսում և շարունակում է նույն քաղաքականությունը»,- ասաց Բեքարյանը: 

Բանախոսի խոսքով՝ պետք չէ երկու երկրների արտգործնախարարների հանդիպումից լուրջ ակնկալիքներ ունենալ, քանի որ փաստ է, որ Ադրբեջանը սահմանին հրաժարվում է պահպանել հրադադարի ռեժիմը: Ըստ նրա՝ անհնար է բանակցել այն պարագայում, երբ կրակոցները չեն դադարում: «Ադրբեջանը ցույց է տալիս, որ ցանկություն չունի կատարելու Վիեննայում և Սանկտ Պետերբուրգում ստանձնած պարտավորությունները»,- շեշտեց քաղաքագետը: 

Հիշեցնենք՝ երեկ՝ փետրվարի 2-ին, Ադրբեջանը Արցախում Թալիշի ուղղությամբ ձեռնարկել էր դիվերսիոն ներթափանցման փորձ, որը հայկական զինված ուժերի կողմից ժամանակին կանխվել էր: Հակառակորդը տվել է մեկ վիրավոր և մեկ գերի, որից ավելի ուշ ադրբեջանական կողմը հրաժարվում էր՝ պատճառաբանելով, որ զինծառայողը ներկայում չի ծառայում ԶՈւ-ում՝ իր ոչ նորմալ վարքի պատճառով: Ավելի ուշ՝ գերի ընկած զինծառայողի հարազատները և ծնողները հերքել էին Ադրբեջանի պաշտպանության նախարարության տարածած այդ հայտարարությունը, ասելով, որ իրենց տղան պայմանագրային հիմունքներով ծառայում է: 

Արցախի նախագահի մամուլի խոսնակ Դավիթ Բաբայանն էլ ԼՈւՐԵՐ.com-ի հետ զրույցում ասել էր, որ հակառակորդը դիվերսիոն ներթափանցման համար հատուկ է ընտրել Թալիշի ուղղությունը, քանի որ, ինչպես հայտնի է՝ այնտեղ իրականացվում է վերաբնակեցման լայնածավալ ծրագիր, նրանք փորձում են ահաբեկել բնակիչներին: Բաբայանը նաև հավելել էր, որ գերու հետ ամեն ինչ կարգին է, կյանքին վտանգ չի սպառնում: