Արման Սահակյանի ճոխ գնումները...

ՀՀ վարչապետ Կարեն Կարապետյանն օրերս ԿԱ Պետգույքի կառավարման վարչության պետ Արման Սահակյանին հանձնարարել է' արագ ավարտին հասցնել մասնավորեցման նոր ծրագրի մշակման աշխատանքները և պատրաստել ամբողջ փաթեթը՝ շեշտելով, որ պետք է կասեցնել պետական այն կառավարիչների գործունեությունը, ովքեր արդյունավետ չեն աշխատում։ Մեկնաբանելով Կարեն Կարապետյանի՝ «էդ յառի պետական կառավարիչների ողնաշարը ջարդելու» հանձնարարականը՝ Արման Սահակյանը վստահեցրեց. «Հանձնարարությունը մենք ամբողջովին հասկացել ենք, ընթացքին դուք ինքներդ ականատես կլինեք»:

Դժվար է ասել՝ ինչպես է պաշտոնյան հասկացել վարչապետի հանձնարարականը, սակայն այսօր արդեն իսկ մամուլը լայնորեն բարձրաձայնում է, որ ոչ ավել, ոչ պակաս՝ ԱԺ նախագահ Գալուստ Սահակյանի որդի Արման Սահակյանը՝ ԿԱ պետական գույքի կառավարման վարչության պետը, իր կուսակից ընկերներից՝ բնապահպանության նախկին նախարար Արամ Հարությունյանին շարունակում է պետբյուջեի հաշվին հարստացնել:

Բանն այն է, որ այս վարչությունը տեղակայված է Տիգրան Մեծի 4 հասցեում՝ «Հանարդնախագիծ» ԲԲԸ-ին պատկանող շենքում, որին տարեկան 10 մլն 608 հազար դրամ վարձավճար է մուծում: Արման Սահակյանի ղեկավարած կառույցը որոշել է հետ չմնալ ճոխ գնումներից. որոշվել է գնել համակարգիչ՝ 750 հազար դրամ արժողությամբ, ևս 14 համակարգիչ էլ նախատեսված է ձեռք բերել արդեն շուկայական գներով՝ 260 հազար դրամով: Բացի այդ, գերատեսչությունն այս տարվա համար կգնի 10 հազար 230 լիտր բենզին, բայց միայն պրեմիում տեսակի, որն ավելի թանկ է վաճառվում, քան ռեգուլյարը: Սա էլ դեռ վերջը չէ. այս կառույցը վճռականորեն տրամադրվել է նաև նորացնել կահույքը, ինչի համար պատրաստվում է ծախսել ավելի քան 600 հազար դրամ:

Արման Սահակյանը ՀՀ կառավարությանն առընթեր պետական գույքի վարչության պետի պաշտոնը զբաղեցնում է 2011 թվականից ի վեր: Փաստացի, այս ընթացքում են կուտակվել այն բոլոր խնդիրները, որոնց լուծման համար այսօր «ողնաշարներ ջարդելու» անհրաժեշտություն է առաջացել: Այս պարագայում հարց է առաջանում՝ արդյո՞ք ջարդելու ենթակա ողնաշարը ճիշտ է ընտրված..

Ստելլա Խաչատրյան