Պարգևատրվեց ոսկե մեդալով

Մայիսի 27-ին ՀՀ սփյուռքի նախարար Հ. Հակոբյանն ընդունեց տեր և տիկին Կազեմինիներին և նրանց ուղեկցող անձանց: Նասսեր Ջ. Կազեմինին ԱՄՆ-ում կրոնական և էթնիկ կազմակերպությունների էթնիկ-ազգային կոալիցիայի ատենապետն է:

Փոխադարձ ողջույնից հետո նախարար Հ. Հակոբյանը նշեց հանրապետության նախագահի այցը էլիս Այլնդ: Նա փոքր-ինչ ներկայացրեց նախարարության գործունեությունը, մասնավորապես նշելով, որ իր գոյության այս կարճ ժամանակահատվածում նախարարությունը հասցրել է ամուր կապ հաստատել ավելի քան 100 երկրների հայ համայնքների ամենատարբեր կառույցների հետ: Հ. Հակոբյանը բարձր գնահատելով պարոն Ջ. Կազեմինի և նրա ղեկավարած կառույցի գործունեությունը, մասնավորապես նշեց, որ «այս կառույցը և քաղաքական, և բարոյական և ազգային նշանակություն ունի: Դուք Ձեր կազմակերպության միջոցով նախևառաջ համերաշխություն և խաղաղություն եք տարածում ամենուր»:

ԱՄՆ-ում կրոնական և էթնիկ խմբերի միջև հանդուրժողականությանը, հարգանքին և ըմբռնմանը նպաստելու, բազմազանությունն ու մշակութային իրազեկումը խթանելու, ինչպես նաև բոլոր էթնիկ խմբերի, ներառյալ ամերիկահայերի առաջադիմությունն ու ձեռքբերումները նշելու համար` նախարար Հ. Հակոբյանը ՀՀ սփյուռքի նախարարության ոսկե մեդալով պարգևատրեց ԱՄՆ-ում կրոնական և էթնիկ կազմակերպությունների էթնիկ-ազգային կոալիցիայի ատենապետ, պարոն Նասսեր Ջ. Կազեմինիին:

Ջ. Կազեմինին երախտագիտությամբ ընդունելով պարգևը` բարձր գնահատեց ԱՄՆ-ում հայ համայնքի կազմակերպվածությունը, հավելելով, որ գրեթե մեկ դար առաջ այդ մարդկանց մեծ մասն առանց ոչնչի էր հասել Ամերիկա, սակայն կարճ ժամանակում ստեղծեց, արարեց` ամենատարբեր ոլորտներում հասնելով մեծ հաջողությունների, և արժանացավ ամերիկյան ժողովրդի հարգանքին:

Ջ. Կազեմինին ՀՀ սփյուռքի նախարարին հանձնեց ՀՀ նախագահ Սերժ Սարգսյանի ԱՄՆ կատարած այցի ընթացքում Էլիս Այլնդում հանդիպման մասին նյութերի հուշագիրքը: