Ոստիկանները բոյկոտել են. երթ՝ առանց ոստիկանների (թարմացվող)

Խորենացի փողոցում` ոստիկանության Երևանի վարչության ՊՊԾ գնդի դիմաց մեկնարկել է մոմավառություն` ի հիշատակ ՊՊԾ գնդի գրավման ժամանակ սպանված երեք ոստիկանների` ոստիկանության գնդապետ Արթուր Վանոյանի, Գագիկ Մկրտչյանի ու Յուրի Տեփանոսյանի:

Ոստիկանների հիշատակին նվիրված հուշարձանի մոտ քաղաքացիներն ու ոստիկանության ներկայացուցիչներն իրենց հարգանքի տուրքն են մատուցել սպանված ոստիկաններին` մոմեր վառելով ու ծաղիկներ խոնարհելով հուշարձանին:

Մեկ տարի առաջ ՊՊԾ գնդի գրավման ժամանակ սպանված երեք ոստիկանների հիշատակը ոգեկոչելու են եկել ինչպես նրանց հարազատները, այնպես էլ ՀՀ ոստիկանապետ Վլադիմիր Գասպարյանը, բազմաթիվ պաշտոնյաներ: 

22:30 Սասնա ծռերին աջակցող երթի մասնակիցներն ավարտեցին երթը: 

21:30 Երթի մասնակիցները Մաշտոցի պողտայի՝ Ազատության հրապարակից հասան  Նալբանդյան փողոցով և ապա շարունակեցին երթը Մոսկովյան պողոտայով: Նշենք, որ ոստիկանները բոյկոտել են և չեն ապահովում Սասնա ծռերին աջակցող երթի մասնակիցների անվտանգությունը:

20:47 Ազատության հրապարակից երթի մասնակիցները Թումանյան եւ Նալբանդյան փողոցներն անցնելով հասան Ազգային անվտանգության ծառայության շենքի մոտ: «Ժառանգություն» կուսակցության ներկայացուցիչ Դավիթ Սանասարյանը բարձրախոսով երթի մասնակիցներին հիշեցրեց, որ երբ ԱԱԾ-ի շենքի մոտով նախկինում անցել են, ոստիկանները շարված են եղել, բայց այսօր  ոստիկաններն այստեղ չեն:

20:00 Երևանի Ազատության հրապարակում մեկնարկեց «Սասնա» ծռեր» զինված խմբի համախոհների հավաք երթը: Երթի մասնակիցերը  «Մա՛հ ռեժիմին», «Ազա՛տ, անկա՛խ Հայաստան»,  «Մենք Սասնա ծուռ ենք» կոչերով սկսեցին քայլերթը երևանյան փողոցներով:

18:45 «Խնդրում եմ ինձ ներեք, ես այսօր կցանկանայի լռել»,- այս մասին ոստիկանության ՊՊԾ գնդի տարածքում լրագրողների հարցերին ի պատասխան ասաց Երեւանի փոխոստիկանապետ Վալերի Օսիպյանը:

18:07 Ոստիկանության պարեկապահակետային ծառայության գնդի տարածքում զինված խմբի գործողություններից մեկ տարի անց կազմակերպվել է հիշատակի միջոցառում՝ նվիրված այդ օրերին զոհված ոստիկաններ գնդապետ Արթուր Վանոյանի, Յուրի Տեփանոսյանի և Գագիկ Մկրտչյանի:

Աշոտ Ահարոնյանը լրագրողների հետ զրույցում, խոսելով քաղած դասերի մասին, նշեց, որ դրանք ավելի ակնհայտ կլինեն շատ ավելի ուշ:

Դիտարկմանն՝ արդյոք Ոստիկանությունը բացառում է  «Սասնա ծռեր» զինված ապստամբության կրկնությունը, Աշոտ Ահարոնյանը պատասխանեց. «Ոստիկանությունը կանխարգելում է, Ոստիկանությունը չի զբաղվում գուշակություններով»: 

Վերջինս լրագրողներին հորդորեց այսօր հարգել զոհվածների հիշատակը և հարցեր չտալ, իսկ ճշտող հարցին՝ ինչո՞ւ է Ոստիկանապետը խուսափում լրագրողների հետ հարցուպատասխանից, Աշոտ Ահարոնյանը պատասխանեց. «Ոստիկանապետին հարցեր տալու տարբեր հնարավորություններ ունեք և կունենաք, Ոստիկանապետը չի խուսափում հարցերին պատասխանելուց»: 

 17:30 Այսօր Երևանի ոստիկանության պարեկապահակային ծառայության գնդի տարածքում բացվեց հուշարձան` ի հիշատակ մեկ տարի առաջ հուլիսի 17-ին ՊՊԾ գնդի տարածքում զինված խմբի գործողությունների հետևանքով զոհված երեք ոստիկանների: Հուշարձանը կոչվում է «Պատիվ ունեմ»: 

17:22 Այսօր` հուլիսի 17-ին, լրացավ «Սասնա Ծռեր»-ի կողմից ՊՊԾ գունդը գրավելու մեկ տարին: