Ինչու է վթարի ենթարկվել թիվ 1 երթուղու տրոլեյբուսը. մանրամասներ

Երևանի քաղաքապետարանի տրանսպորտի վարչության պետ Հենրիկ Նավասարդյանը մանրամասներ ներկայացրեց Մյասնիկյան պողոտայում թիվ 1 երթուղին սպասարկող տրոլեյբուսի վթարից: Հենրիկ Նավասարդյանը դեպքի վայրում տեղեկացրեց, որ Մյասնիկյան պողոտայով դեպի Հերացի փողոց իջնելու ընթացքում տրոլեյբուսի փողերը պոկվել են լարերից, և վարորդը ստիպված է եղել կանգնեցնել տրոլեյբուսը, ձողերը ձգել, տեղը գցել, որպեսզի կարողանա շարունակել ճանապարհը:

«Այդ ընթացքում կարճ միացման նման մի բան է տեղի ունեցել, ինչը վարորդին թույլ չի տվել աշխատել: Նա փորձել է մի փոքր տեղաշարժել տրոլեյբուսը, որպեսզի խանգարող հաղորդալարը պոկվի: Դրա համար նա մի փոքր իջեցրել է ձեռքի արգելակը, որպեսզի մի փոքր առաջ գնա: Այդ պահին, քանի որ թեքության վրա է եղել, մեքենան անմիջապես սկսել է շարժվել, իսկ վարորդը չի հասցրել նստել և արգելակել, ինչի հետևանքով էլ նման դեպք է տեղի ունեցել»,-մանրամասնեց Նավասարդյանը:

Նա հայտնեց, որ վթարի հետևանքով կա 7 տուժած:

Տրոլեյբուսը ճանապարհի բետոնե բաժանարարին բախվելուց առաջ բախվել է նաև դիմացի մեքենային, որի վարորդը ևս տուժածների թվում է և ունի թեթև քերծվածքներ:

Հարցին` վարորդը պատասխանատվության ենթարկվելո՞ւ է, Հենրիկ Նավասարդյանը պատասխանեց. «Դա իրավապահ մարմինները կքննարկեն: Հետագայում կերևա, թե ինչ պատասխանատվության կենթարկվի վարորդը: Ես չեմ ցանկանում իրավապահներից առաջ ընկնել: Բայց կարող եմ ասել, որ վարորդի անփութությունն է վթարի պատճառը»:

Տրոլեյբուսում վթարի պահին հիմնականում եղել են միջին տարիքի մարդիկ: Հենրիկ Նավասարդյանն ընդգծեց, որ իրենց տեղեկություններով տրոլեյբուսում վթարի պահին երեխաներ չեն եղել: Տուժածները տեղափոխվել են տարբեր բժշկական կենտրոններ:

Լուսանկարը՝ Հարություն Հակոբյանի ֆեյսբուքյան էջից