Սերժ Սարգսյանը հրաժեշտի հանդիպում է ունեցել Ֆրանսիայի դեսպանի հետ

Նախագահ Սերժ Սարգսյանն այսօր ընդունել է Հայաստանում Ֆրանսիայի արտակարգ եւ լիազոր դեսպան Ժան-Ֆրանսուա Շարպանտիեին, ով ավարտում է դիվանագիտական առաքելությունը մեր երկրում: 

Հանրապետության Նախագահը շնորհակալություն է հայտնել դեսպան Շարպանտիեին Հայաստանում պաշտոնավարման անցած երեք տարիներին հավատարիմ բարեկամ եւ դաշնակից Ֆրանսիայի հետ մեր երկրի բարեկամության ամրապնդման գործում նրա ներդրած ջանքերի եւ այդ կարճ ժամանակահատվածում հատկապես միջպետական հարաբերությունների տնտեսական բաղադրիչի զարգացմանն արդյունավետ գործունեությամբ նպաստելու համար։ Քաղաքական ակտիվ երկխոսությանը զուգահեռ տնտեսական փոխգործակցության խորացմանը միտված աշխատանքի արդյունքները, Նախագահ Սարգսյանի համոզմամբ, ակնառու են եւ առարկայական. դրանք արտահայտվում են ինչպես Հայաստանում Զարգացման ֆրանսիական գործակալության ակտիվ գործունեությամբ, տարբեր ոլորտներում ֆրանսիական կապիտալի ներդրմամբ իրականացվող ծրագրերով, որոնցից են՝ Վեդիի ջրամբարի կառուցման կարեւոր ծրագիրը, «Վեոլիա» ընկերության գործունեությունը եւ այլն:

Սերժ Սարգսյանը հաջողություն է մաղթել դեսպան Շարպանտիեին հետագա գործունեության մեջ եւ հույս հայտնել, որ մեր երկրից նա կհեռանա միայն հաճելի տպավորություններով ու հիշողություններով՝ շարունակելով մնալ Հայաստանի բարեկամը:

Ֆրանսիայի դեսպանը շնորհակալություն է հայտնել Հանրապետության Նախագահին գնահատանքի եւ ջերմ խոսքերի համար՝ վստահեցնելով, որ ի դեմս իրեն Հայաստանը մշտապես կունենա նվիրյալ բարեկամ: Ժան-Ֆրանսուա Շարպանտիեն իր համար մեծ պատիվ եւ պատասխանատվություն է համարել Հայաստանում դեսպանի պարտականությունների կատարումը եւ ընդգծել, որ անցած երեք տարիները լի են եղել բավականին հիշարժան եւ նշանակալից իրադարձություններով, որոնք առավել ամրապնդել են բարեկամ Հայաստանի հետ Ֆրանսիայի հարաբերությունները:

Դեսպանը հույս է հայտնել, որ հայ-ֆրանսիական տնտեսական համագործակցությունը կշարունակի զարգանալ՝ հասնելով երկու պետությունների քաղաքական հարաբերությունների բարձր մակարդակին: