ՀՀ սփյուռքի նախարարությունը պատրաստակամ է բոլոր հնարավոր միջոցներով աջակցել

Նոյեմբերի 18-ին ՀՀ սփյուռքի նախարարությունում կազմակերպվեց տեսակոնֆերանս Աջարիայի հայ համայնքի ներկայացուցիչների հետ:

Տեսակոնֆերանսին Հայաստանից մասնակցում էին ՀՀ սփյուռքի նախարարի տեղակալ Վարդան Մարաշլյանը, նախարարության աշխատակազմի ԱՊՀ հայ համայնքների վարչության աշխատակիցները' վարչության պետ Անդրանիկ Արշակյանի գլխավորությամբ, նախարարության այլ աշխատակիցներ, Բաթումից' Աջարիայի հայերի միության /ԱՀՄ/ նախագահ Գրիգոր Վարդանյանը, Բաթումի Սուրբ Փրկիչ եկեղեցու վանահայր Տեր Արարատ քահանա Գումբալյանը, հասարակական, երիտասարդական կազմակերպությունների ներկայացուցիչներ, բժիշկներ, ուսուցիչներ, երաժիշտներ, ուսանողներ և այլք:

Տեսակոնֆերանսի նպատակն էր քննարկել Աջարիայի հայ համայնքի հիմնախնդիրները, ներկայացնել ՀՀ սփյուռքի նախարարության ծրագրերը, ամրապնդել և զարգացնել ՀՀ սփյուռքի նախարարության և Աջարիայի հայ համայնքի գործակցությունը, ակտիվացնել համայնքի մասնակցությունը համահայկական ծրագրերին:

Ողջունելով տեսակոնֆերանսի մասնակիցներին՝ ՀՀ սփյուռքի նախարարի տեղակալ Վ.Մարաշլյանը ներկայացրեց նախարարության գործունեությունն ու ծրագրերը' հատկապես անդրադառնալով հայապահպանությանը, Սփյուռքի ներուժի համախմբմանն ուղղված կրթական, մշակութային, երիտասարդական ծրագրերին («Արի տուն», «Երիտասարդ առաջնորդների դպրոց», «Երիտասարդ լրագրողների դպրոց», «Սփյուռքի ամառային համալսարան» և այլն): Նախարարի տեղակալը հորդորեց առավել ակտիվ ներգրավվել ՀՀ սփյուռքի նախարարության ծրագրերին և միջոցառումներին:

ԱՊՀ հայ համայնքների վարչության պետ Ա.Արշակյանը առաջարկեց ներհամայնքային խնդիրների լուծման գործում առավել նախաձեռնողական լինել՝ ներգրավելով բոլոր հնարավորությունները, իսկ ՀՀ սփյուռքի նախարարությունը պատրաստակամ է բոլոր հնարավոր միջոցներով աջակցել այդ հիմնախնդիրների լուծմանը:

Գ.Վարդանյանը ներկայացրեց Աջարիայի հայ համայնքում առկա հիմնախնդիրները: Նախարարության աշխատակիցները պատասխանեցին համայնքի ներկայացուցիչների հարցերին: Պայմանավորվածություն ձեռք բերվեց կազմել տեսակոնֆերանսի ընթացքում բարձրացված խնդիրների լուծման ծրագիր-ժամանկացույց և հետևողականորեն իրականացնել այն: