Շիրակի մարզի գյուղական 7 բնակավայրերի անօթևան ընտանիքների տրամադրվեց անհատույց ֆինանսական աջակցություն

Շիրակի մարզի գյուղական 7 բնակավայրերի 8 անօթևան ընտանիքների տրամադրվեց անհատույց ֆինանսական աջակցություն բնակարանային խնդրի լուծման համար: Աջակցությունը տրամադրվել է ՀՀ կառավարության որոշմամբ՝ մարզպետարանի խնայողությունների հաշվին: 

«Այսօրվա դրությամբ մենք ունենք մոտ 160 ընտանիք, որոնք դեռևս դրամական փոխհատուցում չեն ստացել: Ես ուզում եմ հստակ նշել, որ այն միտքը, թե պետությունը ձեռքերը լվանում է անօթևանության խնդրի լուծման առումով, բացարձակապես իրականությանը չի համապատասխանում: Հնարավորությունների սահմաններում կրկին միջոցներ են ուղղվելու այս խնդրի կարգավորման համար»,- ասաց Շիրակի մարզպետ Արթուր Խաչատրյանը:
Շիրակի մարզպետը շնորհավորեց բնակիչներն, նրանց հաջողություններ մաղթեց և հույս հատնեց, որ նրանք արագ ձեռք կբերեն նոր բնակարաններ, իսկ վերջիններս շնորհակալություն հայտնեցին վերաբերմունքի համար` նշելով, որ չնայած ուշացումով, բայց կկարողնան բնակարանատեր դառնալ:

Ըստ նախատեսվածի, 8 ընտանիքներին տրամադրվելու է 32 մլն 324 հազար դրամ: Նրանցից չորս ընտանիքներ կստանան 2 սենյականոց (3մլն 628 հազար դրամ), 3 ընտանիքներ` 3 (4մլն 288հազար դրամ), իսկ մեկ ընտանիք` 4 սենյականոց (4մլն 948հազար դրամ) բնակարանի փոխհատուցում:
Ընտանիքները սեփական ցանկությամբ այդ գումարը կարող են ծախսել ինչպես նոր բնակարան գնելու, այնպես էլ կառուցելու վրա:

Արմենուհի Մխոյան