Մոսկվան ուշագրավ մեսիջ է հղել Հայաստանին

Վերլուծական 19 Դեկտեմբեր, 2017 17:00

ՌԴ Պետդումայի պատգամավոր Կոնստանտին Զատուլինը Հայաստանի Հանրապետությունում կառավարական համակարգի փոփոխությունից հետո երկրի վարչապետի պաշտոնում է տեսնում ՀՀ Նախագահ Սերժ Սարգսյանին: Այս մասին Զատուլինն ասաց «Սպուտնիկ»-ում կազմակերպված տեսակամուրջի ժամանակ: «Գուցե ես սխալվում եմ, սակայն ես տեսնում եմ Սերժ Սարգսյանին ՀՀ վարչապետի դերում այն բանից հետո, ինչ նա կդադարեցնի նախագահական իր լիազորությունները: Չեմ կարող ասել, թե ով կլինի նրա հաջորդը նախագահի պաշտոնում, սակայն կարծում եմ, որ այդ հարցը կլուծվի: Հայաստանի նախորդ շրջանի պատմությունն ինձ ապացուցել է, որ հայ քաղաքական գործիչները կարող են լսել կարծիքներ և ընդունել որոշումներ, որոնք ի վերջո թույլ են տալիս երկրին շարունակել ճանապարհն առանց լուրջ ներքին կատակլիզմների»,- նշեց Զատուլինը:

Բավական ուշագրավ մեսիջ է, որը գալիս է Մոսկվայից հատկապես ՀՀ-ԵՄ հարաբերությունների ջերմացման ֆոնին: Անկախ այն պատճառներից, որով արվել է այս հայտարարությունը, դժվար չէ կռահել, որ թիրախում ոչ թե Սերժ Սարգսյանի քաղաքական գովքն էր, այլ վարչապետ Կարեն Կարապետյանի կառավարության գործունեությանը տրված գնահատականը: Սա էլ ավելի տարօրինակ է, քանի որ վարչապետի պաշտոնը ստանձնելուց ի վեր Կարապետյանը համարվել է Մոսկվայի մարդը, ով Հայաստանում առաջնորդվելու է առաջին հերթին ռուսական կապիտալի շահերով: Շրջանառվող լուրերի համաձայն՝ հենց Մոսկվայի պնդմամբ Սարգսյանը վարչապետի պաշտոնում նշանակեց Երևանի նախկին քաղաքապետ Կարեն Կարապետյանին, որը նախորդ վեց տարիների ընթացքում բարձր ղեկավար պաշտոններ էր զբաղեցրել ռուսական գազային հսկա «Գազպրոմ»-ում:

Եթե Ռուսաստանի մտահոգությունն այն էր, որ Սերժ Սարգսյանը կորցնում է իրավիճակի վերահսկողությունը, քանի որ «Սասնա Ծռերի» գործողությունից հինգ օր հետո միայն հանդես եկավ հրապարակային հայտարարությամբ, հնարավոր է՝ Սարգսյանին նաև համոզել են, որ Կարապետյանը կարող է շոշափելի փոփոխություններ բերել, ինչին հուսահատորեն սպասում է հանրությունը։ Հայտնելով Կարապետյանի նշանակման մասին՝ Սարգսյանը հայտարարեց, որ նոր վարչապետը կձեռնարկի «փոփոխությունների մեծ ալիք», այդ թվում՝ «արմատական բարեփոխումներ», որոնք «նոր լիցք կհաղորդեն տնտեսական զարգացմանը»: Սակայն ժամանակն անցնում է, իսկ Կարապետյանին այդպես էլ չհաջողվեց սեփական համախոհներից կազմված ուժի բևեռը. դա հասկանում են նաև Մոսկվայում: Ռուսաստանն իր հերթին՝ կլանային հակասությունների առումով որևէ կերպ չի զիջում Հայաստանին: Հետևաբար, չի բացառվում, որ Զատուլինն արտահայտում է ոչ թե պաշտոնական Կրեմլի, այլ այն խմբերի շահերը, որոնք շահերի բախման մեջ են Կարեն Կարապետյանին սատարող «Գազպրոմ»-ի հետ:

Այս տեսանկյունից առավել մեծ ուշադրության է արժանի ռուս մեկ այլ փորձագետ՝ Ստանիսլավ Տարասովի մեկնաբանությունը: Ըստ Տարասովի, դա Հայաստանի ներքին գործն է և Մոսկվայի համար միևնույն է, թե ով կզբաղեցնի այդ պաշտոնը՝ Սարգսյա՞նը թե՞ Կարապետյանը: «Եթե Սերժ Սարգսյանը չլինի էլ վարչապետ, միևնույն է, նա չի հեռանալու քաղաքականությունից, նա ազդելու է որոշումների վրա: Դա լինելու է Ռուսաստանի նման, երբ Պուտինը դարձել էր վարչապետ, իսկ Մեդվեդևը՝ նախագահ: Այդպես էլ Սերժ Սարգսյանի պարագայում կարող է լինել»,- ասաց նա: Սա նշանակում է, որ Մոսկվան 2018-ի օրակարգը չի դիտարկում իբրև համակարգային խնդիր: Եթե անձերի խնդիր քննարկվի, թե ով է չարյաց փոքրագույնը, և այդպես մեխանիզմը գնա, միևնույն է՝ Հայաստանը դրանից չի շահելու, որովհետև ստացվելու է, որ այլընտրանքային զարգացման օրակարգ չի բերվում, այլ խաղը մնում է նորից նույն կուսակցության ներսում: Այս պարագայում Մոսկվայի համար տարբերություն իրոք չկա, քանի որ թե Սարգսյանը, թե Կարապետյանը Կրեմլի համար նույն «փամփշտատուփից» են:

Ստելլա Խաչատրյան