Խնդիրը շատ բարդ է. ռուսական կողմը կարող է հրաժարվել

2011 թվականին Ռուսաստանի ու Վրաստանի միջև ստորագրվել է «Ճանապարհային միջանցքների մասին» պայմանագիր, որի տրամաբանական շարունակությունն էլ օրեր առաջ Վրաստանի վարչապետ Գիորգի Կվիրիկաշվիլիի հայտարարությունն էր:

Այս մասին ԼՈւՐԵՐ.com-ի հետ զրույցում ասաց Վրաստանի հարցերով փորձագետ Ջոնի Մելիքյանը՝ վրացի վարչապետի հայտարարության շուրջ ստեղծված աղմուկը համարելով անտեղի. «Վրացական կողմի  այս հայտարարությունը 2011 թվականին երկու կողմերի միջև ստորագրված պայմանագրի շարունակությունն էր, որի շուրջ տևական ժամանակ է, ինչ բանակցություններ են ընթանում: Բնականաբար, ՀՀ նախագահ Սերժ Սարգսյանի՝ Վրաստան կատարելիք այցի ընթացքում էլ կքննարկվեն ինչպես այս, այնպես էլ տարածաշրջանային, ենթակառուցվածքային և այլ ոլորտների առնչվող հարցեր, հետևաբար, պետք չէ շտապողականություն դրսևորել և հայտարարել, թե վաղն անմիջապես Ռոկիի թունելով մեր բեռները կհասնեն Ռուսաստան»,-ասաց վրացագետը:

Վերջինիս խոսքով՝ խնդիրները դեռ առջևում են, քանի որ կոլեգիալ մարմին ձևավորող պետությունները դեռ պետք է սահմանեն այն ընթացակարգն, ըստ որի պետք է գործեն 2011 թվականին ստորագրված համաձայնագրի կետերը. «Ռուսաստանը կարող է ստորագրել, բայց կարող է նաև չստորագրել այդ համաձայնագրի կետերի տակ: Շատ մեծ հարցական է մնում հարցը՝ ինչպե՞ս են ռուսական և վրացական կողմերն աշխատելու Հարավային Օսեթիայի և Աբխազիայի պարագայում: Քանի որ ճանապարհային միջանցքներն անցնում են Աբխազիայով, իսկ 2011թ.-ին ստորագրված փաստաթղթի մեջ Վրաստանի տարածքային ամբողջականության հարց չկար, հիմա, փաստորեն, այդ հարցն առաջանում է: Եթե Հարավային Օսեթիայով թույլատրվում է երրորդ երկրից բեռներ տեղափոխել, կարող է առաջանալ նաև այդ պետությունների ճանաչման հարցը: Եթե այդ տարածքներում կանգնեն վրացի և ռուս մաքսայիններ, կառուցվեն մաքսատներ, նշանակում է՝ ճանաչում են նաև Հարավային Օսեթիան և Աբխազիան»,-ընդգծեց փորձագետը:

Հիշեցնենք որ  Թբիլիսին միակողմանի է տվել իր համաձայնությունը, և դեռ Վրաստանի վարչապետի արած հայտարարության շուրջ բանակցություններ պետք է վարվեն ռուսական կողմի հետ:

Հավելենք նաև, որ ՀՀ  նախագահ Սերժ Սարգսյանը Ռուսաստան մեկնելուց առաջ այսօր մեկնել է Վրաստան:

Աղավնի Սուքիասյան