ՍԵՖ ՈւՎԿ-ում խառնաշփոթ է. վարկառուները հրաժարվում են առաջարկվող փոխհատուցումից

Ինչպես արդեն տեղեկացրել ենք, հունվարի 1-ի գիշերը Վանաձոր քաղաքում գործող «ՍԵՖ Ինթերնեյշնլ» ունիվերսալ վարկային կազմակերպության գրասենյակից խոշոր չափի գողություն է կատարվել: Գողության մեղադրանքով կալանավորվել է մասնաճյուղի կառավարիչ՝ 35-ամյա Հայկազ Մարտիրոսյանը:

Այսօր արդեն «ՍԵՖ Ինթերնեյշնլ» ՈւՎԿ ՍՊԸ-ն տարածեց հայտարարություն այն մասին, որ «Վանաձոր» մասնաճյուղի հաճախորդների պատշաճ սպասարկման և գույքային շահերի պաշտպանության համար ընկերությունը մշակել է անհրաժեշտ միջոցառումների փաթեթ և սկսել փոխհատուցման գործընթաց:

ԼՈւՐԵՐ.com-ին ահազանգած քաղաքացիները, սակայն, հայտնում են, որ թեև ընկերությունը սկսել է գողացված ոսկյա զարդերի փոխհատուցման գործընթացը, սակայն  կազմակերպության հաճախորդներին առաջարկում են ստորագրել այնպիսի համաձայնագիր, որով փոխհատուցումը վարկային կազմակերպությունը կկատարի ոչ թե այդ զարդերի իրական արժեքի, այլ գրավի պայմանագրում նշված գնահատման թվով:

Քանի որ «ՍԵՖ Ինթերնեյշնլ» ՍՊԸ-ն ստեղծվել է «Վորլդ Վիժն» միջազգային քրիստոնեական բարեգործական կազմակերպության կողմից, որը նաև այս վարկային կազմակերպության ֆինանսավորողն է, կապ հաստատեցինք «Վորլդ Վիժն»-ի հայաստանյան գրասենյակի ղեկավար Ժիրայր Էդիլյանի հետ:

Վերջինս ԼՈւՐԵՐ.com-ի հետ զրույցում նշեց, որ իրենք որևէ կապ չունեն իրենց իսկ հիմնած վարկային կազմակերպության գործունեության հետ, հետեւաբար, չեն կարող գնահատել ՍԵՖ ՈՒՎԿ-ոմ կատարվածը. «Ես չեմ տիրապետում նման տեղեկատվության, չգիտեմ, թե ինչպիսի համաձայնագրեր են առաջարկվում քաղաքացիներին, սակայն պետք է նշեմ, որ կա գործող օրենսդրություն, որի համաձայն էլ կազմվում են վարկառուների տրամադրվող համաձայնագրերը, միևնույն ժամանակ՝ նշեմ՝ «Վորլդ Վիժն»-ը նույնպես ունի կառավարման համակարգ և լավ օրենսդրություն: Այս ամենով հանդերձ, սակայն, պետք է հավելեմ, որ «Վորլդ Վիժն»-ը կապ չունի այդ վարկային կազմակերպությունում կատարվածի հետ»: