Գալուստ Գյուլբենկյանի՝ Թուրքիայում գտնող տունը պանդոկի կվերածեն

Հայազգի խոշոր ձեռնարկատեր, 20-րդ դարի կեսերի խոշորագույն նավթային մագնատ Գալուստ Գյուլբենկյանի (1869-1955) տունը, որը գտնվում է թուրքական Կեսարիա (ժամանակակից անվանմամբ՝ Կայսերի) քաղաքի Թալաս միկրոշրջանում, պատրաստվում են պանդոկի վերածել, հաղորդում է Ստամբուլի հայալեզու «Մարմարա» օրաթերթը:

Պարբերականը նշում է, որ 200-ամյա պատմական շենքը, որի մի հարկն արդեն փլուզվել է, այսօր պատկանում է ոմն Նեջիբ Դինչերի, ով գնել է այն ստամբուլցի մի բժշկից:

Թերթի տվյալներով, Դինչերը պատրաստվում է խոշոր գումար ներդնել շենքը պանդոկի վերածելու համար: «Նա պատրաստվում է այն անվանել «Գյուլբենկյան պանդոկ»,- գրում է պարբերականը:

Կեսարիան Թուրքիայի խոշոր քաղաքներից է, որը գտնվում է լեռնային գոտում: Թալասը կանաչ միկրոշրջան է, որը մի ժամանակ հայկական թաղամաս է եղել, և որում դեռ զգացվում է հայկական ճարտարապետության շունչը:

20-րդ դարասկզբում Գալուստ Գյուլբենկյանն ակտիվ մասնակցություն է ունեցել նավթի համաշխարհային արդյունահանմանը` աշխարհի խոշորագույն ընկերություններին օգնելով օպտիմալացնել արդյունահանումը: 1907-ին նրա աշխատանքի արդյունքը դարձավ դանիական և բրիտանական նավթային ընկերությունների միաձուլումը Royal Dutch Shell ընկերության մեջ, աշխատանքի համար Գյուլբենկյանը ստացել է նոր ընկերության բաժնետոմսերի 5%-ը:

Հետագայում Գյուլբենկյանը մասնակցել է նավթային այլ ընկերությունների (Turkish Petroleum Company, Iraq Petroleum Company…) ստեղծմանը` որպես պարգևատրում միշտ ստանալով 5% բաժնեմաս, ինչի համար էլ նրան անվանել են «պարոն 5 տոկոս»: