Հայ ճարտարապետները՝ Նժդեհի արձանը հանելու՝ ռուսների պահանջի մասին

Անցյալ շաբաթ Ռուսաստանի Դաշնության Պետական Դումայում կայացել է կլոր սեղան-քննարկում «Ֆաշիզմի հերոսացման և նեոնացիզմի վերածնման դեմ պայքարի, օրենսդրական ասպեկտներ» թեմայով։

Միջոցառմանը խոսվել է նաև ֆաշիզմի հերոսացման դեմ պայքարի ստորագրահավաքի մասին՝ ընդգծելով, որ հավաքվել է 200 000 ստորագրություն։ Միջոցառման մասնակիցները մատնանշել են նաև, որ այնտեղ կա նաև Երևանում գտնվող Գարեգին Նժդեհի հուշարձանի հանման հատուկ պահանջ։

Ռուսաստանի՝ Երևանում Նժդեհի արձանը հանելու պահանջի վերաբերյալ ԼՈւՐԵՐ.com-ի թղթակիցը զրուցեց Ճարտարապետների միության նախագահ Մկրտիչ Մինասյանի հետ.

«Թող հավաքեն, ի՞նչ է պատահել: Եթե դու պետություն ես, դու չես հանում արձանը, վերջացավ- գնաց, ինչո՞ւմն է բանը: Ամեն թեթև զեփյուռից պետք չէ մտահոգվել: Աշխարհում տեսեք՝ ինչեր են անում: Ոչ մի խնդիր չկա: Եթե առանձին պետութուն ես, գտնում ես, որ պետք է մնա արձանը, ուրեմն թող կմնա»,- ասաց Մինասյանը: 

Մեզ հետ զրույցում ճարտարապետ Գուրգեն Մուշեղյանն էլ նշեց, որ այստեղ երկու խնդիր կա՝ քաղաքական և հուշարձանի հետ կապված. «Դա միջպետական խնդիր է: Քաղաքական որոշում է կայացվել, քննարկում է եղել, արձանը դրվել է: Այսինքն՝ այստեղ ոչ թե արժեքների մասին է խոսքը՝ լավն է արձանը, թե վատը, այլ քաղաքական որոշում է: Մեր իշխանություններն, իհարկե, դեմ կգնան պահանջին և, բնականաբար, չեն հանի արձանը:

Նժդեհը մեր ժողովրդի հերոսներից մեկն է: Նա մեծ հայրենասեր էր, ով նշանակալի դեր է խաղացել Զանգեզուրի դեպքերի հետ կապված»,- ասաց նա՝ ընդգծելով՝ ինչպե՞ս կարող են մեր առջև նման պահանջ դնել:

Նշենք, որ «Ֆաշիզմի հերոսացման և նեոնացիզմի վերածնման դեմ պայքարի, օրենսդրական ասպեկտներ» թեմայով կազմակերպված միջոցառմանը մասնակցել են Պետդումայի պատգամավորներ, Դաշնության խորհրդի և հանրային պալատի անդամներ, ՌԴ նախագահի թեկնածուներ, քաղաքագետներ, փորձագետներ ու ԶԼՄ-ների ներկայացուցիչներ։

Կլոր սեղանի ընթացքում քաղաքագետ Սերգեյ Մարկովը, Դիոնիս Կապտարը և մյուսները շեշտել են, որ Հայաստանը այն երկրների թվում է, որտեղ այսօր, ըստ նրանց, կան ֆաշիզմի հանցակիցների արձաններ՝ չնայած որ՝ Հայաստանը Ռուսաստանի դաշնակիցն է։

Հիշեցնենք, որ հայ պետական և ռազմական գործիչ Գարեգին Նժդեհին նվիրված հուշարձանը 2016թ. մայիսի 25-ին տեղադրվեց Երևանի Խաչքարերի պուրակում:

Նշենք նաև, որ այդ օրերին ՌԴ ԱԳՆ պաշտոնական ներկայացուցիչ Մարիա Զախարովան՝ անդրադառնալով Երևանում պետական ռազմական գործիչ Գարեգին Նժդեհի արձանի տեղադրմանը, ասել էր. «Բոլորը գիտեն մեր վերաբերմունքը Հայրենական մեծ պատերազմի, ինչպես նաև նացիզմի, ռասիզմի, ծայրահեղականության հերոսացման նկատմամբ: Այդ հարաբերությունները ամրագրված են նաև միջազգային փաստաթղթերում: Մեզ համար անհասկանալի է՝ ինչու է այդ արձանը տեղադրվել: Չէ՞ որ մենք բոլորս գիտենք հայ ժողովրդի անմահ սխրանքը Հայրենական պատերազմում, Երկրորդ համաշխարհային պատերազմում»:

Սոնա Հարությունյան